बैशाख ६,काठमाडौं । सांसद् सरस्वति सुब्बाले जग्गा कित्ताकाट खुल्ला गर्ने सरकारको निर्णयप्रति आपत्ति जनाएकी छन् । प्रतिनिधिसभा बैठकमा आकस्मिक समयमा बोल्दै सांसद सुब्बाले मंगलबार बसेको मन्त्रिपरिषद बैठकले गरेको जग्गाको कित्ताकाट खोल्ने निर्णय सच्याउन सरकारलाई आग्रह गरेकी हुन् ।
सुब्बाले भनिन्,‘भू-उपयोग नियमावली २०७९ लाई संशोधन गर्दै जग्गाको कित्ताकाट खोल्ने समाचार सुन्दा दुःख लाग्यो । नेपाल अहिले पनि खाद्य संकटको मारमा छ । जलवायु परिवर्तनको उच्च जोखिममा छ । मौलिक हकअन्तर्गत रहेका खाद्य सम्प्रभुता,सुरक्षित आवासलगायत सम्पूर्ण व्यवस्था कार्यान्वयन हुन सकिरहेको छैन ।’
कित्ताकाट रोक्का गरिएपछि धेरै स्थानीय तहले भू-उपयोग योजना तर्जुमा गर्न लागेकै बेला पुरानै अवस्थामा कित्ताकाट खोल्नु देश र वर्तमान परिवेश विपरित रहेको उनको भनाइ छ ।
भू-उपयोग नीति लागू नगरी पुरानै अवस्थामा कित्ताकाट खोल्नु देश र जनता विरुद्धको काम भएको बताइन् । सरकारको निर्णयले जमिनको खण्डिकरण बढाउने र कृषि क्षेत्रलाई समाप्त पार्ने सुब्बाको भनाइ छ ।
कित्ताकाट खुला गरेमा दलालीकरण बढ्ने र जमिन खण्डीकरणमा परिणत हुने बताइन्।