एक बट्टा चुरोटको विवादमा गर्भवती महिलालाई जलाइयो

फ्लोरिडा (एजेन्सी) । अमेरिकाको फ्लोरिडामा गर्भवती प्रेमिकाको शरीरमा पेट्रोल छर्केर उनका दुई सन्तानका सामु जिउँदै जलाएर भागेका एक व्यक्तिको प्रहरीले खोजी गरिरहेको छ ।

हियालिहस्थित आफ्नै निवासमा ३२ बर्षीय नायल ग्रुल्लानले आफ्नै गर्भ बोकेकी २७ बर्षीया प्रेमिकालाई एक बट्टा चुरोटका लागि भएको विवादको कारण त्यसरी आक्रमण गरेका हुन् ।

विवादपछि रिस नियन्त्रण गर्न एकछिन घर बाहिर बसेर फर्केकी उनलाई अचानक ग्रुल्लानले हमला गरेका थिए ।

शरीर जल्न थालेपछि तत्काल दौडेर कमिज खोली सावर हालेर आगो निभाउने प्रयास गरिए पनि उनको छाती र घाँटी नराम्ररी जलेको प्रहरीले जनाएको छ ।

ती महिलाको पहिलो सम्बन्धबाट जन्मेका १ बर्षीय र ४ बर्षीय दुई सन्तान रहेको बताइएको छ ।

प्रहरीले सशस्त्र डकैतीको अभियोगमा १२ बर्ष लामो कारावास सजाय भोगेर ८ महिनाअघि मात्र छुटेका उनी अझै परीक्षणकालमै रहेका थिए ।

उनको ती महिलासँग ६ महिनादेखि मात्र डेटिङ चलिरहेका बताइएको छ ।