फागुन २४, काठमाडौं । अन्तर्राष्ट्रिय महिला दिवसको अवसर पारी राष्ट्रिय ध्वजाबाहक नेपाल एयरलाइन्सले आजको दुबई/काठमाडौं रुटमा उडेको ए३२० जहाजको सबै क्रु मेम्बर महिला राखेर नयाँ इतिहास बनाएको छ। पाइलट भावना पन्त र को-पाइलट सृजना रावतले जहाज उडाएका थिए ।
एयरहोस्टेस समेत सबै महिला राखेर उडानको सम्पूर्ण जिम्मेवारी महिलाले सम्हालेका छन्। उक्त टोलीलाई त्रिभुवन अन्तर्राष्ट्रिय विमानस्थलमा संस्कृति, पर्यटन तथा नागरिक उड्डयनमन्त्री सुदन किरातीले स्वागत गरेका थिए ।
दुई दिन अगाडि चालक दलको यसै जोडीले यो जहाज दुबई लगेको थियो । जुन आफैंमा इतिहास थियो । आज ११३औं अन्तर्राष्ट्रिय महिला दिवसको अवसर पारेर नेपाल एयरलाइन्सले यो संयोग जुराएको हो ।