बालबालिकाले सुरक्षित वातावरणमा पढ्न नपाए दीर्घकालीन असर पर्छ

चैत,१ काठमाडौ  । वीरगञ्ज महानगरपालिकाका प्रमुख विजयकुमार सरावगीले आइतबार शिक्षा पत्रकार समाज र आसमान नेपालले संयुक्त रुपमा आयोजना गरेको ‘विद्यालयमा सुरक्षित सिकाइ’ विषयक अन्तरक्रियामा बालबालिकाले सुरक्षित हिसाबले पढ्न नपाए दीर्घकालीन असर पर्ने बताएका छन् ।

शिक्षा क्षेत्रको सुधारका लागि प्रदेश र संघ सरकारले स्थानीय तहसँगै समन्वय र सहकार्य गरेर अघि बढ्नुपर्ने कुरामा सरावगीले जोड दिएका छन् । उनले सामुदायिक विद्यालयका बालबालिका सुरक्षित नरहेको बताएका हुन्।

‘परिवारबाटै बालबालिका पीडित भएको र उनीहरुमाथि बीच बाटोमा नचाहिने व्यवहार हुने गरेको साथै स्कुलभित्रको कथा धेरै हुने तर खुल सकेको छैन्,’ सरावगीले भने, ‘विद्यालयमा उजुरी पेटिका राखिएको भएपनि कसैले उजुरी गरेनन् । यसको मतलब विद्यार्थी डराएका हुन सक्छन् । शिक्षकबाटै विद्यार्थीहरुले मानसिक पीडा सामना गरिरहेका छन् ।’ बालबालिकाहरुले सुरक्षित वातावरणमा पढ्न नपाए ‘डिप्रेसन’मा जान सक्ने खतरा बढेको कुरालाई समेत उनले औंल्याएका छन् ।  

पोखरिया नगरपालिकाका उपप्रमुख सलमा खातुनले विद्यालयमा सुरक्षित सिकाइका लागि सरोकारवाला एक हुनुपर्नेमा जोड दिइन् । ‘अभिभावकले केही सिक्छन् भनेर बालबालिकालाई विद्यालय पठाउँछन् । सुरक्षित सिकाइ नहुँदा कुण्ठित र आत्मविश्वास कम भएका विद्यार्थी बन्छन्,’ उनले भनिन्, ‘यस्तो हुन नदिन एक अर्कालाई दोषारोपण गरेर भन्दा पनि  सबै सरोकारवाला एक भएर काम गर्नुपर्छ । नत्र सम्स्या झन बढ्दै जान्छ ।’

कार्यक्रममा सहभागी पालिका शिक्षा समितिका पदाधिकारी, शिक्षा शाखा अधिकारी तथा जनप्रतिनिधिहरुले सुरक्षित सिकाइका लागि सबै गम्भीर रहेको बताएका छन् ।