कांग्रेसमा महिला नेतृत्वलाई प्राथमिकता, वरिष्ठसहित चार उपसभापति बनाइने

असोज  १९ , काठमाडौं । नेपाली कांग्रेसले पार्टीको सांगठनिक संरचनामा परिवर्तन गर्दै वरिष्ठ उपसभापति र महिला उपसभापतिको व्यवस्था गर्ने निर्णय गरेको छ। कांग्रेसको १५औँ महाधिवेशन सुरु हुनुअघि सोमबार बसेको केन्द्रीय कार्यसमिति बैठकले पदाधिकारीको संख्या बढाउने निर्णय गरेको हो।
नयाँ व्यवस्थाअनुसार कांग्रेसमा उपसभापतिको संख्या चार पुग्नेछ। त्यसमध्ये एक जना वरिष्ठ उपसभापति हुनेछन्। साथै, कम्तीमा एक जना उपसभापति महिला हुनुपर्ने व्यवस्था गरिएको छ।
महामन्त्रीको संख्या पनि दुईबाट बढाएर तीन पुर्‍याउने निर्णय भएको छ। तीन महामन्त्रीमध्ये कम्तीमा एक जना महिला हुनुपर्ने व्यवस्था गरिएको कांग्रेसले जनाएको छ। यससँगै पार्टीको नेतृत्व तहमा महिलाको प्रतिनिधित्व सुनिश्चित गर्ने प्रयास गरिएको छ।
त्यस्तै, सहमहामन्त्रीको संख्या ११ बाट बढाएर १३ पुर्‍याउने निर्णय भएको छ। नयाँ व्यवस्थाअनुसार आठ जना समावेशी समूहबाट र दुई जना खुला प्रतिस्पर्धाबाट निर्वाचित हुनेछन् भने तीन जना सभापतिबाट मनोनीत हुने व्यवस्था गरिएको छ।
कांग्रेसले केन्द्रीय कार्यसमितिको सदस्य संख्या पनि बढाउने निर्णय गरेको छ। पार्टीको विधानमा आवश्यक संशोधन गरी यी व्यवस्था लागू गरिनेछ।
पार्टीको १५औँ महाधिवेशनका क्रममा नेतृत्व संरचनालाई थप समावेशी बनाउने, महिला तथा युवाको सहभागिता बढाउने र विभिन्न समूहलाई पार्टीको निर्णय तहमा समेट्ने विषयमा दबाब बढिरहेका बेला कांग्रेसले पदाधिकारीको संरचना विस्तार गरेको हो।