“स्वास्थ्य मन्त्रालयमा संरचना सुधार स् निर्णय प्रक्रिया छिटो बनाउन एक सचिवीय प्रणाली लागू”

साउन १५  , काठमाडौं । स्वास्थ्य तथा जनसंख्या मन्त्रालयले सेवा प्रवाह र निर्णय प्रक्रिया छिटो बनाउन आन्तरिक संरचनामा व्यापक सुधार गरेको छ। मन्त्रालयले झन्झटिला र दोहोरो जिम्मेवारी सिर्जना गर्ने संरचनाहरू हटाउँदै अब एक सचिव मात्र रहने व्यवस्था लागू गरेको जनाएको छ।
मन्त्रालयका अनुसार यसअघि बहुसचिवीय संरचनाका कारण फाइल पास हुन ढिलाइ, निर्णय प्रक्रियामा जटिलता तथा समन्वय अभावजस्ता समस्या देखिँदै आएका थिए। नयाँ व्यवस्थासँगै यी समस्या समाधान भई कामकारबाही थप प्रभावकारी र छरितो हुने विश्वास गरिएको छ।
संरचना सुधार अन्तर्गत विभिन्न महाशाखा र शाखाहरूको कार्यक्षेत्र पनि पुनर्संरचना गरिएको छ। जिम्मेवारी स्पष्ट पारिएको र दोहोरो काम हटाइएको मन्त्रालयले जनाएको छ। यसले स्वास्थ्य सेवा व्यवस्थापन, नीति निर्माण तथा कार्यान्वयनमा गति ल्याउने अपेक्षा गरिएको छ।
अधिकारीहरूका अनुसार नयाँ प्रणालीले स्वास्थ्य क्षेत्रका कार्यक्रमहरू छिटो कार्यान्वयन गर्न, आपतकालीन अवस्थाको व्यवस्थापन प्रभावकारी बनाउन तथा नागरिकलाई छिटो सेवा उपलब्ध गराउन सहयोग पुग्नेछ।
मन्त्रालयले यसलाई प्रशासनिक सुधारको महत्वपूर्ण कदमका रूपमा व्याख्या गर्दै आगामी दिनमा अन्य संरचनात्मक सुधारहरू समेत अघि बढाउने संकेत गरेको छ।