‘डरले काम गर्न गाह्रो’ : स्वास्थ्य क्षेत्रको अवस्थाबारे कार्कीको चिन्ता

साउन १४ , काठमाडौ ।स्वास्थ्य क्षेत्रको वर्तमान अवस्थाप्रति चिन्ता व्यक्त गर्दै सांसद तथा चिकित्सक तोषिमा कार्कीले डाक्टरहरू असुरक्षित र मानसिक रूपमा दबाबमा काम गर्न बाध्य भएको बताएकी छन्।
उनले भनिन्, “डाक्टरको हात काँपिरहेको छ र मन त्रसित छ, यस्तो अवस्थामा गुणस्तरीय सेवा दिन कठिन हुन्छ।” स्वास्थ्यकर्मीमाथि बढ्दो आक्रमण, असुरक्षा र कार्यस्थलको दबाबका कारण चिकित्सकहरू डरको वातावरणमा काम गर्नुपरेको उनको भनाइ छ।
कार्कीले स्वास्थ्य संस्थामा कार्यरत जनशक्तिको सुरक्षा सुनिश्चित गर्न सरकार गम्भीर हुनुपर्नेमा जोड दिइन्। उनले चिकित्सक तथा स्वास्थ्यकर्मीमाथि हुने दुर्व्यवहार रोक्न कडा कानुनी व्यवस्था र प्रभावकारी कार्यान्वयन आवश्यक रहेको उल्लेख गरिन्।
उनका अनुसार असुरक्षित वातावरणले स्वास्थ्य सेवाको गुणस्तरमा प्रत्यक्ष असर पार्ने भएकाले तत्काल सुधारका कदम चाल्न ढिला गर्न नहुने चेतावनी दिइएको छ।
स्वास्थ्य क्षेत्रका सरोकारवालाहरूले पनि पछिल्लो समय चिकित्सकहरूमाथि भएका घटनापछि सुरक्षाको विषयलाई प्राथमिकतामा राख्नुपर्ने बताएका छन्।
यस विषयले स्वास्थ्य सेवा प्रणालीको अवस्था र चिकित्सकहरूको कार्य वातावरणबारे गम्भीर बहस सुरु गराएको छ।