सांसदका छोराको कारले २६ वर्षीया महिलाको ज्यान गएपछि प्रहरीमा मुद्दा

भदौ ५ , काठमाडौं । भारतको हैदराबादमा आन्ध्र प्रदेशका राज्यसभा सांसद तथा जनसेना पार्टीका नेता लिङ्गमानेनी रमेशका छोरा लिङ्गमानेनी सञ्जुशविरुद्ध प्रहरीले मुद्दा दर्ता गरेको छ। उनलाई तीव्र तथा लापरबाहीपूर्ण रूपमा गाडी चलाएको आरोपमा मुद्दा दर्ता गरिएको हो।

प्रहरीका अनुसार अगस्ट १६ मा सञ्जुशले चलाएको एस्टन मार्टिन कारले म्याडापुरको इनोर्बिट मलनजिकै २६ वर्षीया भारती मुखीलाई ठक्कर दिएको थियो। उनी सडक पार गरिरहेका बेला तीव्र गतिमा आएको कारले ठक्कर दिँदा गम्भीर घाइते भएकी थिइन्।

दुर्घटनापछि सञ्जुशले आफ्नै कारमा भारतीलाई अस्पताल पुर्‍याएका थिए। तर चिकित्सकले उनलाई मृत घोषणा गरेका थिए। भारती उक्त मलमा लाइफस्टाइल स्टोरमा काम गर्ने कर्मचारी रहेको प्रहरीले जनाएको छ।

प्रहरीले घटनामा भारतीय न्याय संहिताको धारा १०६(१) अन्तर्गत मुद्दा दर्ता गरेको छ। उक्त धाराले लापरबाही वा असावधानीका कारण व्यक्तिको मृत्यु गराएको घटनालाई समेट्छ।

हालसम्म सञ्जुशलाई पक्राउ गरिएको छैन। प्रहरीका अनुसार उक्त अपराध धरौटीमा छुट्न सक्ने प्रकृतिको भएकाले कानुनी प्रक्रियाअनुसार अनुसन्धान अघि बढाइएको छ। प्रहरीले उनलाई घटनाबारे सूचना दिँदै नोटिससमेत जारी गरेको जनाएको छ।

प्रहरीका अनुसार सञ्जुशको मदिरा तथा लागुऔषध परीक्षण पनि गरिएको थियो, जसको नतिजा नकारात्मक आएको बताइएको छ। साइबराबाद प्रहरीले घटनाको अनुसन्धानमा सबै कानुनी प्रक्रिया पालना भइरहेको जनाएको छ।