११ वर्षमै विश्व कीर्तिमान, बोधाना सिभानन्दन बनिन् सबैभन्दा कम उमेरकी महिला ग्रान्डमास्टर

असोज १३, काठमाडौं । लन्डनकी ११ वर्षीया बोधाना सिभानन्दनले चेसमा ऐतिहासिक उपलब्धि हासिल गरेकी छन्। उनी सबैभन्दा कम उमेरमा महिला ग्रान्डमास्टरको उपाधि हासिल गर्ने खेलाडी बनेकी छन्।

उज्बेकिस्तानको समरकन्दमा सम्पन्न ४६औँ चेस ओलम्पियाडमा इङ्ल्यान्डको प्रतिनिधित्व गर्दै बोधनाले महिला ग्रान्डमास्टर बन्न आवश्यक तेस्रो तथा अन्तिम मापदण्ड पूरा गरेकी हुन्। उनले प्रतियोगिताका सबै ११ खेल इङ्ल्यान्डको पहिलो बोर्डमा खेलेर ८ अंक हासिल गरिन्।

महिला ग्रान्डमास्टर उपाधिका लागि आवश्यक २ हजार ३ सयभन्दा बढी रेटिङ उनले यसअघि नै पार गरिसकेकी थिइन्। अन्तिम मापदण्ड पूरा गरेपछि उनको नाम चेस इतिहासमा सबैभन्दा कम उमेरकी महिला ग्रान्डमास्टरका रूपमा दर्ज भएको हो। यसअघि यो कीर्तिमान १२ वर्षको उमेरमा उपाधि हासिल गरेका खेलाडीहरूको नाममा थियो।

बोधनाको चेस यात्रा भने निकै कम उमेरमै सुरु भएको थियो। कोभिड–१९ महामारीका बेला घरमै रहँदा उनले चेस सिक्न थालेकी थिइन्। त्यसपछि उनले विभिन्न राष्ट्रिय तथा अन्तर्राष्ट्रिय प्रतियोगितामा लगातार उत्कृष्ट प्रदर्शन गर्दै धेरै कीर्तिमान बनाएकी छन्।

सन् २०२६ मै उनले बेलायतको सबैभन्दा कम उमेरकी महिला चेस च्याम्पियन बन्ने उपलब्धिसमेत हासिल गरेकी थिइन्। पछिल्लो उपलब्धिसँगै उनले अन्तर्राष्ट्रिय मास्टर उपाधितर्फ पनि अर्को महत्वपूर्ण कदम अघि बढाएकी छन्। समरकन्दमा उनले दोस्रो अन्तर्राष्ट्रिय मास्टर मापदण्डसमेत पूरा गरेकी छन्।

उपाधि जितेपछि बोधनाले आफू यस उपलब्धिमा खुसी भए पनि यहीँ रोकिने पक्षमा नरहेको र आगामी दिनमा अझै नयाँ इतिहास बनाउन चाहेको बताएकी छन्।