सडकमा बच्चा जन्माउन बाध्य बबिता पासवानको विषयमा सरकारसँग जवाफ माग

भदौ २६, काठमाडौं । राष्ट्रिय प्रजातन्त्र पार्टीकी प्रमुख सचेतक खुश्बु ओलीले राजविराज नगरपालिका–१४, पर्साकी बबिता पासवानले सडकमा बच्चा जन्माउन बाध्य भएको घटनाबारे सरकारको ध्यानाकर्षण गराएकी छन्।

प्रतिनिधिसभाको बैठकमा बोल्दै ओलीले बबिता पासवानले अस्पतालको पेटीमै बच्चा जन्माउनुपर्ने अवस्था आउनु राज्यको स्वास्थ्य सेवा प्रणालीमाथि गम्भीर प्रश्न भएको बताइन्।

उनले चुनावका क्रममा प्रधानमन्त्री बालेन्द्र शाहले ‘गोजीमा पैसा नहुनुले उपचार पाउनुपर्छ’ भन्ने प्रतिबद्धता व्यक्त गरेको स्मरण गराउँदै त्यसको कार्यान्वयनबारे प्रश्न उठाइन्।

ओलीका अनुसार बबिताका श्रीमान्सँग उपचारका लागि दुई हजार रुपैयाँ मात्र थियो। अस्पतालमा आवश्यक रकममध्ये करिब १२ सय रुपैयाँ नपुगेपछि पैसा खोज्न जाने क्रममा बबिता पनि सँगै निस्किएकी थिइन्। त्यस क्रममा उनले अस्पतालको पेटीमै बच्चा जन्माउन बाध्य भएको ओलीले बताइन्।

‘म प्रधानमन्त्रीज्यूलाई सोध्न चाहन्छु– तपाईंले घोषणा गर्नुभएको एजेण्डाको कार्यान्वयनमा राज्य कहाँ उभिएको छरु’ ओलीले प्रश्न गरिन्।

उनले घटनाबारे प्रधानमन्त्री र स्वास्थ्य मन्त्रीसँग जवाफ माग गर्दै आर्थिक अभावकै कारण कुनै पनि महिलाले सुरक्षित प्रसूति सेवा पाउनबाट वञ्चित हुन नहुने बताइन्।

बैठकमा अन्य सांसदहरूले समेत बबिता पासवानले सडकमा बच्चा जन्माउन बाध्य भएको घटनालाई गम्भीर रूपमा उठाउँदै सरकारसँग जवाफ माग गरेका छन्।

सांसदहरूले आधारभूत स्वास्थ्य सेवा र सुरक्षित मातृत्वको संवैधानिक तथा कानुनी सुनिश्चितताका बाबजुद आर्थिक अभावका कारण महिलाले अस्पतालमै अपमानजनक र जोखिमपूर्ण अवस्था भोग्नुपर्ने स्थिति अन्त्य गर्न सरकारको ध्यानाकर्षण गराएका छन्।