मनोसामाजिक अवस्था बुझेर मात्रै भोटेकोशी बाढी प्रभावित विद्यार्थीलाई विद्यालय फर्काउन निर्देशन

भदौ २५, काठमाडौं । रसुवाको भोटेकोशी नदीमा आएको बाढीबाट प्रभावित विद्यार्थीको मनोसामाजिक अवस्था बुझेर आवश्यक परामर्श तथा सहयोग उपलब्ध गराएपछि मात्रै नियमित कक्षा सञ्चालन गर्न शिक्षा विभागले सम्बन्धित पालिका र विद्यालयलाई निर्देशन दिएको छ।

शिक्षा तथा खेलकुद मन्त्रालयअन्तर्गत शिक्षा विभागको योजना तथा कार्यक्रम शाखाले बुधबार साँझ पत्र जारी गर्दै यस्तो निर्देशन दिएको हो। बाढीका कारण विद्यार्थीमा भय, त्रास, तनाव तथा अन्य मनोसामाजिक असर पर्न सक्ने भएकाले उनीहरूलाई तत्काल नियमित पठनपाठनमा फर्काउनुअघि मानसिक तथा भावनात्मक अवस्था पहिचान गर्नुपर्ने विभागले जनाएको छ।

विभागले सम्बन्धित विद्यालय तथा स्थानीय तहलाई स्वास्थ्य संस्था र स्वास्थ्यकर्मीसँग समन्वय गरी बाढी प्रभावित विद्यार्थीको मनोसामाजिक अवस्था पहिचान गर्न आग्रह गरेको छ। अवस्था हेरेर आवश्यक विद्यार्थीलाई मनोसामाजिक परामर्श तथा अन्य सहयोग उपलब्ध गराउनसमेत विभागले निर्देशन दिएको छ।

विद्यार्थी नियमित कक्षामा सहभागी हुन मानसिक रूपमा तयार भएको सुनिश्चित गरेपछि मात्रै पठनपाठन सञ्चालन गर्नुपर्ने विभागको भनाइ छ। विपद्पछि विद्यार्थीमा देखिन सक्ने डर, तनाव र मानसिक आघातलाई बेवास्ता गर्दा उनीहरूको सिकाइ तथा दैनिक व्यवहारमा समेत असर पर्न सक्ने भएकाले विद्यालय फर्काउने प्रक्रियामा मनोसामाजिक पक्षलाई प्राथमिकता दिन भनिएको हो।