महिलाको सुरक्षित यात्राका लागि बंगलादेशमा ‘पिंक बस’ सेवा सुरु

भदौ ३ , काठमाडौं । बंगलादेशको राजधानी ढाकामा महिलाको सुरक्षित र सहज यात्रालाई प्राथमिकता दिँदै ‘पिंक बस’ सेवा सञ्चालनमा ल्याइएको छ। महिलाका लागि मात्रै सञ्चालन गरिने यो सार्वजनिक यातायात सेवाको औपचारिक उद्घाटन मंगलबार गरिएको हो।
सडक यातायात, पुल, रेल तथा जल यातायात मन्त्री शेख रबिउल आलमले बंगलादेश रोड ट्रान्सपोर्ट कर्पोरेसन (बीआरटीसी) को तेजगाउँ बस डिपोमा आयोजित कार्यक्रममा उक्त सेवाको उद्घाटन गरेका हुन्।
बीआरटीसीका अनुसार बुधबारदेखि ढाका, नारायणगञ्ज, गाजीपुर, बोगुरा र चट्टोग्रामका विभिन्न मार्गमा नियमित रूपमा बस सञ्चालन गरिनेछ।
यस योजनाअन्तर्गत सुरु गरिएका १४ वटा बसमध्ये १० वटा बस ढाका र आसपासका क्षेत्रमा सञ्चालन हुनेछन् भने बोगुरा र चट्टोग्राममा दुई–दुईवटा बस सञ्चालन गरिनेछ।
यस सेवाको विशेषता भनेको बसमा महिला चालक र महिला सहचालकको व्यवस्था गर्नु हो। सार्वजनिक यातायातमा महिलाले भोग्ने असुरक्षा, दुर्व्यवहार र असहजतालाई कम गर्ने उद्देश्यले यो योजना अघि सारिएको हो।
ढाकाका विभिन्न मार्गमा सञ्चालन हुने बसहरूले नयाँ बजार, गुलिस्तान, मोतिझिल, मिर्पुर, मोहम्मदपुर, कमलापुर, पल्टन र अब्दुल्लापुरलगायतका क्षेत्रलाई जोड्नेछन्।
सरकारले महिलाको सार्वजनिक यातायातमा पहुँच विस्तार गर्नुका साथै सुरक्षित यात्राको वातावरण सिर्जना गर्न यो सेवा प्रभावकारी हुने विश्वास व्यक्त गरेको छ।
बंगलादेशमा महिलाको सुरक्षासम्बन्धी बहस बढिरहेका बेला सुरु गरिएको यो सेवालाई महिला–मैत्री सार्वजनिक यातायात प्रणालीको नयाँ अभ्यासका रूपमा हेरिएको छ।