दुना टपरी उद्योगले मधुवनका महिलालाई घरमै रोजगारी

भदौ ५ , काठमाडौं । बर्दियाको मधुवनमा सञ्चालनमा आएको ग्रामीण महिला दुना टपरी उद्योगले स्थानीय महिलालाई घरमै काम गर्ने अवसरसँगै आम्दानीको स्रोत दिएको छ। घरायसी जिम्मेवारीका कारण बाहिर गएर काम गर्न नसक्ने महिलाले उद्योगबाट पात र अन्य सामग्री लगेर घरमै दुना टपरी बनाएर बिक्री गर्ने गरेका छन्।
मधुवन नगरपालिका–५ की हरि गाहाले फुर्सदको समयमा दुना टपरी बनाएर आम्दानी गर्दै आएकी छन्। उनका अनुसार लाफाको प्रतिगोटा ३ रुपैयाँ, दुनाको आकारअनुसार २५ पैसादेखि १ रुपैयाँ र बाँसका सिन्काको प्रतिमुठा २५ रुपैयाँ पाउने गरिएको छ। ‘बुढेसकालमा समय पनि कटेको छ, पैसा पनि पाएकी छु,’ उनले भनिन्।
मधुवन–६ की कौशिला आचार्यले पनि घरायसी काम सकेपछि दुना टपरी बनाएर महिनामा करिब ६ हजार रुपैयाँसम्म आम्दानी गर्ने गरेको बताइन्।
उद्योगकी अध्यक्ष कमला सुनारका अनुसार उद्योगमा नियमित आउन नसक्ने महिलालाई घरमै काम गर्ने सुविधा दिइएको छ। उद्योगले आवश्यक सामग्री उपलब्ध गराउने र तयार सामग्री घरबाटै संकलन गर्ने गरेको छ।
हाल १० जना महिलाले उद्योगमा काम गरिरहेका छन् भने माग बढेपछि थप १८ जनालाई तालिम दिइएको छ। अब २८ जना महिला हाते तथा मेसिनबाट दुना टपरी उत्पादनमा जोडिएका छन्।
उद्योगले सामुदायिक वनबाट सालका पात प्रतिकिलो २५ रुपैयाँ र बाँसका सिन्का प्रतिमुठा २५ रुपैयाँमा खरिद गर्दै आएको छ। पात संकलन र सिन्का तयार गर्ने काममा पुरुषहरू पनि सहभागी छन्।
गत वर्ष असोजदेखि उत्पादन सुरु गरेको उद्योगले हालसम्म ४० हजार रुपैयाँभन्दा बढीको दुना टपरी बिक्री गरिसकेको सचिव ओमा घर्तीले बताइन्। पूजाआजा तथा धार्मिक कार्यक्रममा प्रयोग हुने हाते दुना टपरीको माग बढेपछि उत्पादन विस्तार गरिएको उनको भनाइ छ।
सम्बर्धन परियोजनाको आर्थिक तथा प्राविधिक सहयोगमा सञ्चालित उद्योगले स्थानीय स्रोतको उपयोग गर्दै महिलालाई घरमै रोजगारी र आर्थिक आत्मनिर्भरताको अवसर प्रदान गरेको छ।