चिसोयाममा छालाको स्याहार कसरी गर्ने ?

मङ्सिर ११, काठमाडौं । जाडोमा छालामा बढी सुख्खापन देखापर्छ । यस्तो अवस्थामा विभिन्न समस्या सिर्जना हुन्छन् । चिसोमा छालाको चमकमा कमी देखिन्छ । छाला रुखो, ज्यान नभएको, निस्तेज र कान्तिहीन मात्र हुँदैन यसले आफ्नो आकर्षणसमेत गुमाउँछ । त्यसैले चिसो मौसमको सुरुमै सावधानी अपनाउन सक्यौं भने यसको प्रभावबाट जोगिन सकिन्छ र आफ्नो प्रभावकारी व्यक्तित्वलाई पनि यथावत् राख्न सहयोग पुर्‍याउँछ । चिसा मौसममा छालालाई विशेष सुरक्षा दिनु आवश्यक हुन्छ । नयाँ बानेश्वरस्थित आयना व्युटीपालर एण्ड ट्रेनिङ सेन्टरकी व्युटीसियन सोनु श्रेष्ठसँगको कुराकानीमा आधारित जानकारी । 

जाडोमा ओठ तथा अनुहारको छाला फुट्ने, कुर्कुच्चा फुट्ने, हातखुट्टा फुट्ने आदि समस्याले धेरैलाई सताउँछ । यस्ता समस्याबाट जोगिने विभिन्न उपाय छन् ।

के गर्ने ?

अनुहार र शरीरमा नियमित रूपमा उपयुक्त र गुणस्तरयुक्त क्रिम र मोइस्चराइजर लगाउनुपर्छ । नरमपन छालाको रक्षाकवच हो । पहिले गाउँघरमा चिसोयाममा नुहाउनुअघि जीउमा तेलले मालिस गर्ने सल्लाह दिने गरिन्थ्यो । हाल नुहाएपछि भने बडी आयल लगाउन बिर्सनुहुन्न । विज्ञहरुका  अनुसार नुहाएको तीन मिनेटभित्रै शरीरमा मोइस्चराइजर लगाउनुपर्छ । यसो गर्दा छालामा भएको पानीलाई मोइस्चराइजरले सुक्न दिँदैन ।

यस्तै, नुहाएपछि भने तौलियाले जीउ कस्सेर पुछ्नु हुन्न । यसले गर्दा छालाको नरमपन र प्राकृतिक तेल दुवै बाहिर निस्किन्छ । बढी तातो पानीले नुहाउँदा छाला अझ बढी सुख्खा हुने गरेको छ । तातो पानीले छालाको प्राकृतिक तेललाई विस्थापन गर्छ । यसैले मनतातो पानीले कम समय अर्थात् पाँचदेखि १० मिनेटमै नुहाइसक्नुपर्छ । नुहाउने क्रममा बढी समय तातो पानीमा बिताउनाले शरीरमा सुख्खापन बढ्न जान्छ । बाथरुम बन्द गरेर नुहाउँदा यसले शरीरलाई चाहिने आद्रतालाई जोगाएर राख्छ ।

यस्तै, साबुनले छाला रुखो हुने भएको नरम प्रकृतिको साबुन प्रयोग गर्नुपर्छ । चिसोयाममा साबुनको कम प्रयोग गर्नुपर्छ । साबुनको सट्टा फेसवास, बडी वास वा सावर जेल राम्रो मानिन्छ । बास्नायुक्त साबुन वा यस्ता उत्पादनको प्रयोग नगर्नुस् । यस्ता उत्पादनमा रसायनको मात्रा बढी हुन्छ । यस्तो साबुन लगाउनुस् जसमा न्युट्रल पीएच भ्याल्यु होस् ।

अनुहारलाई हातले हल्कासँग सफा गर्नुस् । चिसोयाममा छालाको मृत कोषलाई हटाउनका लागि बलपूर्वक छिटोछिटो नदल्नुस् । मुख्यतः रुखो छाला भएकाहरूले यसो गर्नु हुँदैन । यसो गर्दा अनुहारमा छिट्टै चाउरीपन देखिन्छ ।

छालाको स्याहारसँगै खुट्टा र हातको स्याहार पनि त्यत्तिकै आवश्यक छ । समयसमयमा हातको सफाइ अर्थात् मेनिक्योर र खुट्टाको सफाइ अर्थात् पेडिक्योर गर्नुपर्छ । छालासँगै टाँस्सिने गरी ऊनजन्य कपडा लगाउनु हुँदैन । पहिले सुती कपडाको गन्जी जस्तो लुगा लगाएर मात्र ऊनका कपडा लगाउनुपर्छ।

घरेलु उपाय 

• दूधको तरमा मह मिसाएर राति सुत्नुअघि ओठमा लगाउँदा फुटेको ओठ ठीक हुन्छ । 
• दिनभरिको कामको थकानपछि बेलुका मनतातो पानीमा खुट्टा डुबाएर केहीबेरपछि सफा टाबलले पुछ्ने । सुख्खा भएपछि ग्लिसरिनले हल्का मसाज गर्ने । यसो गर्दा कुर्कुच्चा फुट्दैन ।
• राति सुत्नुअघि हातखुट्टा धोएर ग्लिसरिनमा कागतीको रस मिसाएर लगाउँदा खुट्टा फुटेको बिसेक हुन्छ ।