विद्यार्थी युवतीमाथि बढ्दो हिंसाप्रति मलेसियामा चिन्ता, लैंगिक हिंसाको कोणबाट अनुसन्धान गर्न आग्रह Nepalese Women -

असोज २२ , काठमाडौं । मलेसियामा पछिल्लो समय विद्यार्थी युवतीको मृत्यु तथा हिंसाका घटनालाई लैंगिक हिंसाको कोणबाट समेत गहिराइमा अध्ययन गर्नुपर्ने आवाज उठेको छ।

मलेसियाकी कानून तथा संस्थागत सुधारमन्त्री अजालिना ओथमान सइदले पछिल्ला घटनामा विशेषगरी युवतीहरू पीडित भइरहेकाले त्यसको कारण र प्रवृत्तिबारे गम्भीर अनुसन्धान आवश्यक रहेको बताएकी छन्। उनका अनुसार केही घटनामा पीडित र आरोपितबीच सहपाठी, साथी वा प्रेम सम्बन्धजस्ता परिचयसमेत देखिएको छ।

मन्त्री अजालिनाले अस्वीकार, ईर्ष्या वा आफूले चाहेको कुरा नपाउँदा हिंसामा उत्रिने प्रवृत्ति खतरनाक लैंगिक तथा पुरुषवादी मानसिकताको संकेत हुनसक्ने बताइन्। उनले युवाहरूलाई स्वस्थ सम्बन्ध, आपसी सम्मान र व्यक्तिगत सीमाको महत्त्वबारे सचेत गराउनुपर्नेमा जोड दिइन्।

उनको भनाइ पछिल्लो समय जोहोरस्थित एक विद्यालयमा १६ वर्षीया विद्यार्थी इरेन सोफिया मोहद खैरोउल फैसल मृत अवस्थामा भेटिएपछि आएको हो। अक्टोबर ३ मा विद्यालय परिसरमा मृत भेटिएकी ती विद्यार्थीको घटनामा तीन जना १६ वर्षीय पुरुष विद्यार्थीलाई प्रहरीले अनुसन्धानका लागि पक्राउ गरेको छ। प्रारम्भिक अनुसन्धानमा उनको टाउकोमा लागेको चोटका कारण मृत्यु भएको बताइएको छ।

मन्त्री अजालिनाले हिंसा तथा दुर्व्यवहारलाई केवल शारीरिक आक्रमणका रूपमा बुझ्न नहुने बताउँदै भावनात्मक, मनोवैज्ञानिक तथा अन्य प्रकारका उत्पीडनलाई पनि गम्भीर रूपमा लिनुपर्ने उल्लेख गरिन्।

उनले १८ वर्षभन्दा कम उमेरका आरोपितलाई कडा सजाय दिनु मात्र समाधान नभएको भन्दै प्रारम्भिक हस्तक्षेप, सुधार र पुनर्स्थापनामा जोड दिइन्। विद्यालयमा उजुरी सुनुवाइ प्रभावकारी नभए विद्यार्थीले ‘एन्टी–बुलिङ ट्रिब्युनल’मार्फत पनि उजुरी गर्न सक्ने उनले बताइन्।

मलेसियामा विद्यालयमा हुने बुलिङको समस्या पनि गम्भीर बन्दै गएको छ। प्रधानमन्त्री अनवर इब्राहिमका अनुसार सन् २०२६ को जनवरीदेखि अगस्टसम्म देशभर ५ हजार ६८१ वटा बुलिङका घटना रिपोर्ट भएका छन्। वास्तविक संख्या अझ बढी हुनसक्ने अधिकारीहरूको भनाइ छ, किनकि धेरै घटना रिपोर्ट नै नहुने सम्भावना छ।

मन्त्री अजालिनाले विद्यार्थी तथा युवतीलाई असहज, उत्पीडित वा असुरक्षित महसुस भए तत्काल सम्बन्धित निकायमा उजुरी गर्न आग्रह गरेकी छन्। उनका अनुसार समयमै उजुरी र हस्तक्षेप गर्न सके हिंसा थप गम्भीर बन्नुअघि नै रोकथाम गर्न सकिन्छ।

मलेसियामा पछिल्ला घटनाले विद्यालय तथा विश्वविद्यालयमा महिला विद्यार्थीको सुरक्षा, लैंगिक हिंसा, बुलिङ र स्वस्थ सम्बन्धबारे शिक्षा तथा प्रभावकारी उजुरी संयन्त्रको आवश्यकता पुनः उजागर गरेको छ।