गरिमा हत्या प्रकरणमा आक्रोश, दोषीमाथि कारबाही माग्दै सिमरामा सडक अवरुद्ध

भदौ ४ , काठमाडौं । बाराको सिमरामा तीन वर्षीया गरिमा चौधरीको बलात्कारपछि हत्या भएको घटनालाई लिएर स्थानीयले प्रदर्शन गर्दै वीरगन्ज–पथलैया सडकखण्ड अवरुद्ध गरेका छन्। बुधबार दिउँसोदेखि सुरु भएको सडक अवरोध बिहीबार पनि जारी छ।
जीतपुर–सिमरा उपमहानगरपालिका–१ की गरिमाको शव मंगलबार साँझ फेला परेको थियो। घटनामा संलग्न रहेको आरोपमा प्रहरीले दुई जनालाई पक्राउ गरेको छ। तर बालिका हराएको जानकारी समयमै गराउँदा पनि प्रहरीले खोजीमा प्रभावकारी पहल नगरेको भन्दै स्थानीयले प्रहरी प्रशासनको भूमिकामाथि प्रश्न उठाएका छन्।
परिवारले यसअघि नै केही व्यक्तिको नाम उल्लेख गरेर प्रहरीमा उजुरी दिएको भए पनि उनीहरूमाथि तत्काल अनुसन्धान नगरिएको प्रदर्शनकारीको आरोप छ। उनीहरूले बालिकाको खोजीमा तीन दिनसम्म प्रभावकारी पहल नभएको दाबी गरेका छन्।
प्रदर्शनकारीले घटनामा संलग्नलाई कडा कारबाही गर्नुपर्ने र इलाका प्रहरी कार्यालय सिमराका प्रहरी नायब उपरीक्षक (डीएसपी) दिलीप क्षेत्रीलाई निलम्बन गर्नुपर्ने माग राखेका छन्।
सडक खुलाउने विषयमा बुधबार स्थानीय प्रशासन र प्रदर्शनकारीबीच पटक–पटक वार्ता भए पनि सहमति जुट्न सकेन। बाराका सहायक प्रमुख जिल्ला अधिकारी छविरमण भट्टराईले डीएसपी निलम्बनको माग स्थानीय प्रशासनको अधिकार क्षेत्रभन्दा बाहिर रहेको बताएका छन्।
प्रहरीको भूमिकाको छानबिन, घटनामा दोषीमाथि कारबाही र जिम्मेवार अधिकारीमाथि जवाफदेहिता सुनिश्चित नभएसम्म आन्दोलन जारी राख्ने प्रदर्शनकारीले बताएका छन्।