असम सरकारको ‘ओरुनोडोई ३.०’ योजना, महिलालाई मासिक १,२५० रुपैयाँ सहयोग रहेको छ।

साउन १७ , काठमाडौं  । भारतको असम सरकारले महिलाको आर्थिक सशक्तीकरणका लागि ‘ओरुनोडोई ३।०’ योजना पुनः सञ्चालनमा ल्याएको छ। यस योजनाअन्तर्गत लक्षित महिलाहरूलाई मासिक १,२५० रुपैयाँ आर्थिक सहयोग प्रदान गरिने भएको छ।
यो योजना विशेषगरी गरिब तथा कमजोर आय भएका परिवारका महिलालाई केन्द्रमा राखेर सञ्चालन गरिएको हो। प्राप्त रकम सिधै बैंक खातामा पठाइने (डाइरेक्ट बेनिफिट ट्रान्सफर) व्यवस्था गरिएको छ, जसले महिलालाई आफ्नै आर्थिक निर्णयमा बलियो बनाउने लक्ष्य राखिएको छ।
सरकारले यस योजनामा थप सुविधा पनि समावेश गरेको छ। आवश्यक पर्दा लाभग्राही महिलाले भविष्यमा प्राप्त हुने रकमको आधारमा बिना ब्याज ऋण वा अग्रिम सहयोग लिन सक्ने व्यवस्था गरिएको छ।
ओरुनोडोई योजना सन् २०२० मा सुरु भएको थियो र हाल यसको तेस्रो संस्करण ३.० मार्फत अझ प्रभावकारी रूपमा कार्यान्वयन गर्ने प्रयास गरिएको हो। यो योजनाले लाखौं महिलालाई घरखर्च, स्वास्थ्य, शिक्षा र पोषणजस्ता आधारभूत आवश्यकतामा सहयोग पुर्‍याउने विश्वास गरिएको छ।
विशेषगरी एकल महिला, विधवा, अशक्त तथा आर्थिक रूपमा कमजोर महिलालाई प्राथमिकतामा राखेर छनोट गरिने व्यवस्था रहेको छ।