श्रीलंकाबाट महिला च्याम्पियन्स ट्रफी आयोजनाको अधिकार खोसियो

भदौ १२ , काठमाडौं । श्रीलंकाले पहिलोपटक आयोजना हुन लागेको आईसीसी महिला च्याम्पियन्स ट्रफी २०२७ आयोजना गर्ने अधिकार गुमाएको छ। श्रीलंका क्रिकेट ९एसएलसी० को प्रशासनमा सरकारी हस्तक्षेप जारी रहेको भन्दै अन्तर्राष्ट्रिय क्रिकेट परिषद् ९आईसीसी० ले प्रतियोगिता श्रीलंकाबाट अन्यत्र सार्ने निर्णय गरेको सन्डे टाइम्सले जनाएको छ।

छ टोली सहभागी हुने प्रतियोगिता सन् २०२७ को फेब्रुअरी १४ देखि २८ सम्म श्रीलंकामा आयोजना गर्ने तयारी थियो। तर आईसीसीले प्रतियोगिता अर्को देशमा सार्ने निर्णय गरेको एसएलसी ट्रान्सफर्मेसन कमिटीका सचिव प्रकाश साफ्टरले पुष्टि गरेका छन्।

उनका अनुसार प्रतियोगिताका लागि नयाँ आयोजक तय हुन बाँकी छ। नयाँ आयोजकबारे आईसीसी बोर्डको आगामी बैठकले निर्णय गर्ने अपेक्षा गरिएको छ।

हाल एसएलसीको व्यवस्थापन सरकारले गठन गरेको ट्रान्सफर्मेसन कमिटीले गरिरहेको छ। उक्त समितिलाई क्रिकेट बोर्डमा सुधार, संविधान संशोधन तथा शासन प्रणालीमा परिवर्तनलगायतका जिम्मेवारी दिइएको छ।

ट्रान्सफर्मेसन कमिटी गठन भएपछि आईसीसीले एसएलसीका प्रतिनिधिलाई आफ्नो बोर्ड बैठकमा सहभागी हुनसमेत अनुमति दिएको छैन। आईसीसीले यसअघि एसएलसीमा यथाशीघ्र निर्वाचन गराउनुपर्नेमा जोड दिँदै आएको थियो।

प्रतियोगिता श्रीलंकाबाट सारिँदा श्रीलंका क्रिकेट र देशको पर्यटन क्षेत्रले समेत आर्थिक क्षति व्यहोर्नुपर्ने देखिएको छ। प्रतियोगितामा सहभागी टोली, अधिकारी, प्रसारण, दर्शक तथा पर्यटन गतिविधिबाट हुने आम्दानी गुम्ने सम्भावना छ।

प्रतियोगिताको नयाँ आयोजकले श्रीलंकाको सहभागितामा समेत असर पार्न सक्नेछ। पहिलो महिला च्याम्पियन्स ट्रफीमा आयोजक राष्ट्रसहित विश्व वरीयताका शीर्ष पाँच टोली सहभागी हुने अपेक्षा गरिएको छ। हाल श्रीलंका छैटौँ स्थानमा रहेकाले नयाँ आयोजक शीर्ष ६ बाहिरको देश बनेमा श्रीलंकाको सहभागिता जोखिममा पर्न सक्ने सन्डे टाइम्सले जनाएको छ।

यसअघि सन् २०२३ मा आईसीसीले एसएलसीलाई निलम्बन गरेपछि श्रीलंकाले २०२४ आईसीसी यू–१९ पुरुष विश्वकप आयोजना गर्ने अधिकार पनि गुमाएको थियो। उक्त प्रतियोगिता पछि दक्षिण अफ्रिकामा सारिएको थियो।

यद्यपि, आईसीसीले हालसम्म श्रीलंकाबाट २०२७ महिला च्याम्पियन्स ट्रफी सारिएको विषयमा औपचारिक घोषणा गरेको छैन।