अदालतमा आत्मदाह प्रयासपछि दुई जना पक्राउ

चैत २१ काठमाडौं । उच्च अदालत सुर्खेतको गेटमा धर्नामा बसेका दुई जना महिलाले आत्मदाह गर्न खोजेपछि जिल्ला प्रहरी कार्यालयले नियन्त्रणमा लिएको छ।

श्रीमान् रामबहादुर शाहीको हत्यामा संलग्न मध्ये केहीलाई जिल्ला अदालत जाजरकोटले धरौटीमा र केहीलाई साधारण तारेखमा छोडेको भन्दै जुनीचाँदे गाउँपालिका–६ मइपकी निर्मला शाही र उनलाई साथ दिने सर्मिला शाहीलाई प्रहरीले नियन्त्रणमा लिएको हो।

जिल्ला अदालतले धरौटीमा छोडेकाहरुलाई पुर्पक्षका लागि कारागार चलान गर्नुपर्ने भन्दै मृतककी श्रीमती निर्मलाले उच्च अदालतमा पुनरावेदन गरेकी थिइन्।

पुनरावेदनसँगै उनी बुधबारदेखि उच्च अदालतको गेटमा धर्नामा बसेकी थिइन्। बिहीबार दिउँसोसँगै धर्नामा बसेकी सर्मिलाले पेट्रोल ल्याएर शरीरमा खन्याई आगो लगाउने प्रयास गरेपछि तत्कालै प्रहरीले दुबैलाई पक्राउ गरेको हो।

जिल्ला प्रहरी कार्यालय सुर्खेतका प्रवक्ता डिएसपी वीरेन्द्रवीर विश्वकर्माले आत्मदाहको प्रयास गरेपछि दुबैलाई नियन्त्रणमा लिइएको बताए।

‘उहाँ (निर्मला) बुधबारदेखि शान्तिपूर्ण धर्नामा हुनुहुन्थ्यो,’ डिएसपी विश्वकर्माले भने, ‘बिहीबार सर्मिलासहित धर्नामा बसिराखेको बेला पेट्रोल छर्केर आत्मदाहको प्रयास भएपछि नियन्त्रणमा लिएका हौं।’

आत्मदाह गर्न उक्साउने सर्मिलालाई मात्रै नियन्त्रणमा लिइएको भएपनि निर्मलाले पनिसँगै जाने भनेपछि दुबैलाई नियन्त्रणमा राखिएको उनको भनाई छ।

गत माघ १७ गते जुनीचाँदे गाउँपालिका–५ स्थित शिवपुरी माध्यमिक विद्यालयमा भइरहेको राष्ट्रपति रनिङ शिल्ड प्रतियोगिता हेर्न गएका शाही भोलिपल्ट मृत फेला परेका थिए।

प्रहरीले घटनामा संलग्न रहेको आरोपमा नौ जनालाई पक्राउ गरेको थियो। जिल्ला प्रहरी कार्यालय जाजरकोटका अनुसार हत्यामा संलग्न रहेको आरोपमा तुलाकुमारी शाही, बीरबहादुर शाही, जयबहादुर शाही, प्रेमबहादुर शाही, रत्नबहादुर शाही, मैसरा शाही, रेशमबहादुर शाही, रामबहादुर शाही र एक नाबालकलाई पक्राउ गरिएको थियो।

कर्तव्य ज्यान मुद्दामा पक्राउ परेका मध्ये फागुन १३ गते जिल्ला अदालतले पाँच जनालाई धरौटी तथा साधारण तारेखमा छोडेको थियो भने चार जना कारागार चलान भएका थिए।

प्रहरीका अनुसार तुलाकुमारी, बीरबहादुर, जयबहादुर र प्रेमबहादुर पुर्पक्षका लागि जिल्ला कारागार जाजरकोटको थुनामा छन्।