पोल्यान्डमा युक्रेनी महिला शरणार्थीको सहयोगमा जुटेको संस्था संकटमा

भदौ ९ , काठमाडौं । युक्रेन युद्धका कारण पोल्यान्ड पुगेका महिला तथा बालबालिकालाई सहयोग गर्दै आएको महिला सहायता संस्था आर्थिक संकटमा परेको छ। युद्ध सुरु भएको चार वर्षपछि अन्तर्राष्ट्रिय सहयोग घट्दै गएको, शरणार्थीप्रति नकारात्मक धारणा बढ्दै गएको र सरकारी सहयोग कटौती भएपछि संस्था सञ्चालनमै चुनौती थपिएको हो।

क्राकोस्थित संस्थाले लैंगिक हिंसाबाट प्रभावित युक्रेनी महिला तथा बालबालिकालाई सुरक्षित आश्रय, स्वास्थ्य उपचार, मनोवैज्ञानिक सहयोग, रोजगारी र आवासको व्यवस्था गर्दै आएको छ। हालसम्म संस्थाको आश्रयस्थलमा १०० भन्दा बढी महिला तथा बालबालिका बसिसकेका छन्।

युद्ध सुरु हुँदा करिब ३५ लाख युक्रेनी नागरिक पोल्यान्ड पुगेका थिए। अधिकांश शरणार्थी महिला र बालबालिका थिए। उनीहरूलाई सुरुवाती चरणमा पोल्यान्डका नागरिक तथा सरकारले व्यापक सहयोग गरेका थिए।

तर पछिल्ला वर्षहरूमा युक्रेनी शरणार्थीप्रति विरोध र विभेद बढ्दै गएको छ। पोल्यान्ड प्रहरीका अनुसार सन् २०२६ को जुलाई मध्यसम्म १८० युक्रेनी नागरिक पूर्वाग्रहमा आधारित अपराधका पीडित भएका छन्।

सरकारले शरणार्थीका लागि दिइने केही सहायता कटौती गरिरहेको छ। यसबाट विशेषगरी एकल आमा, धेरै सन्तान भएका परिवार, वृद्ध तथा अपांगता भएका व्यक्ति बढी प्रभावित हुने अधिकारकर्मीहरूको भनाइ छ।

अन्तर्राष्ट्रिय सहयोगसमेत घटेको छ। संयुक्त राष्ट्रसंघीय शरणार्थी निकायका अनुसार सन् २०२२ मा युक्रेनी शरणार्थीका लागि पहिचान गरिएका आवश्यकताको ९४ प्रतिशत रकम जुटेकोमा यस वर्ष करिब आधा आवश्यकता मात्रै वित्त पोषण भएको छ।

सहायता संस्था अनुसार अहिले हिंसाबाट पीडित महिलासँगै आफ्ना बालबालिकाका लागि खाना र सुरक्षित आवास जुटाउन नसकेका महिलाहरूबाट समेत सहयोगको माग बढिरहेको छ। युद्ध जारी रहेकाले महिला तथा बालबालिकाका लागि सुरक्षित आश्रय र सामाजिक सहयोगको आवश्यकता अझै उच्च रहेको संस्थाहरूले बताएका छन्।