धर्मभक्त मानव अंग प्रत्यारोपण केन्द्रले बिरामीलाई औषधिमा ठग्यो, ७५ प्रतिशत नाफा खानेलाई कारबाही होस्’

असार ४, काठमाडौं ।भक्तपुरस्थित सहिद धर्मभक्त माथेमा मानव अंग प्रत्यारोपण केन्द्रले डायलायसिस गराउनुपर्ने बिरामीहरूलाई औषधिमा ठगी गर्दै आएको देखिएको छ। केन्द्रले इपोफिट नामक औषधिमा ७५ प्रतिशत नाफा खाएर डायलायसिस गराउने बिरामीहरूलाई बेच्दै आएको पाइएको हो।

प्रतिनिधि सभामा सांसद् डा.तोषिमा कार्कीले केन्द्रले ७५ प्रतिशत नाफा खाएर औषधि बिक्री गरिरहेको बताइन्। कार्किले भनिन्, ‘निकै लाजमर्दो विषय उठान गर्दैछु। राज्यको ठगीको नमुना छ। मसँग सहिद धर्मभक्त माथेमा मानव अंग प्रत्यारोपण केन्द्रको बिल छ। यो स्वास्थ्य बिमीत डायलायसिस गराइरहेका बिरामीको बिल हो। यसमा इपोफीट नामक औषधिको बिक्री मूल्य एक हजार चार सय ५ रुपैयाँ छ। यसको खाली खोल पनि मसँगै छ। जसमा अधिकतम खुद्रा बिक्री मूल्य पाँच सय भारतीय मूल्य अर्थात् नेपाली आठ सय रुपैयाँ पर्न आउँछ। २० प्रतिशत लिन अधिकतम पाउनेमा यहाँ अधिकतम ७५ प्रतिशत बढी लिइएको छ।’

राज्यले कति नाफा मात्र खाएसम्म कालोबजारी नमानिने भन्दै सरकारलाई प्रश्न गरिन्। कार्किले भनिन्, ‘यसरी संस्थागत रूपमै स्वास्थ्य बिमाबाट नागरिकलाई भुक्तानी हुन्छ भन्दैमा ठग्न मिल्छ। हप्तामा तीन पटकसम्म डायलायसिस गराउनुपर्ने नागरिकलाई गरिबलाई राज्यले यसरी लुट्ने ? स्वास्थ्य बिमालाई धरासायी बनाउन सरकारी संस्थाहरू पनि नीतिगत रूपमै संलग्न देखिए। यस्ता ठगीलाई तत्कालै कारबाही गरियोस्।’

अन्नपूर्ण