दसैँका नाममा पशुमाथि हुने हिंसा नियन्त्रण गर्न आशिका तामाङको माग

असोज १६, काठमाडौं । राष्ट्रिय स्वतन्त्र पार्टी ९रास्वपा० की सांसद आशिका तामाङले दसैँका क्रममा पशुबलिका नाममा निर्दोष पशुपन्छीमाथि हुने क्रूर व्यवहार रोक्न सरकारसँग आग्रह गरेकी छन्। उनले शुक्रबार प्रतिनिधिसभाको बैठकमा बोल्दै पशु कल्याणसम्बन्धी कानुन प्रभावकारी रूपमा कार्यान्वयन गर्न सरकारको ध्यानाकर्षण गराएकी हुन्।

सांसद तामाङले मानिसका लागि दसैँ उत्सव भए पनि पशुहरूका लागि पीडाको समय बन्ने गरेको बताइन्। उनले दसैँमा देवी दुर्गाको आराधनाभन्दा खसी, बोका र राँगा काट्ने विषयलाई बढी प्राथमिकता दिने प्रवृत्तिमाथि प्रश्न उठाइन्।

उनका अनुसार दसैँका बेला पशुलाई लखेट्ने, भीडभाडमा घोच्ने तथा कुटपिट गर्ने जस्ता व्यवहार देखिने गरेका छन्। यस्ता गतिविधिले पशुमाथि अनावश्यक क्रूरता हुने भन्दै उनले सार्वजनिक रूपमा गरिने पशुबलिका क्रममा अपनाइने व्यवहारबारे सरकार गम्भीर हुनुपर्ने बताइन्।

नेपालमा पशु कल्याणका लागि कानुनी व्यवस्था भए पनि त्यसको कार्यान्वयन प्रभावकारी नभएको तामाङको भनाइ छ। उनले पशु कल्याणसम्बन्धी नीति तथा कानुनलाई थप प्रभावकारी बनाउन र पशुमाथि हुने क्रूरता नियन्त्रणका लागि आवश्यक कदम चाल्न सरकारको ध्यानाकर्षण गराइन्।