पुस ५, काठमाडौं । नेकपा माओवादी केन्द्रले विधान अधिवेशनका लागि गठन गरेको विधान मस्यौदा समितिलाई १५ दिनको समय दिएको छ । प्रधानमन्त्री निवास बालुवाटारमा बिहान बसेको पदाधिकारी बैठकले उपाध्यक्ष पम्फा भुसालको नेतृत्वमा ७ सदस्य मस्यौदा समिति गठन गरेको थियो ।
यसमा महासचिव देव गुरुङ, उपमहासचिवत्रय गिरिराजमणि पोखरेल, वर्षमान पुन, जनार्दन शर्मा, सचिवद्वय गणेश साह र राम कार्की सदस्य रहेका छन् ।
बैठकले १५ दिनमा मस्यौदा बुझाउन समय सीमा दिएको सचिव देवेन्द्र पौडेलले जानकारी दिए । उनकाअनुसार पुस १६ गते चार महिने रूपान्तरण अभियान समापन गर्ने निर्णय गरेको छ । सातै प्रदेशबाट रिपोर्ट आएपछि फेरि पदाधिकारी बैठक बसेर समीक्षा गर्ने निर्णय भएको पौडेलले जानकारी दिए ।
परिमार्जनसहित मस्यौदा अनुमोदन भएपछि माघ एक महिना विधान मस्यौदा छलफल अभियान चलाउने छौँ । तलबाट आएको सुझावलाई समेटेर मस्यौदालाई अनुमोदन गर्छौँ । विधान अधिवेशनअघि केन्द्रीय समिति बैठक बस्नेछ । फागुनको पहिलो साता विधान अधिवेशन सकेर हामी विशेष महाविधेनको तयारीमा लाग्छौँ ।’
साउनको तेस्रो साता सकिएको माओवादी केन्द्रीय समिति बैठकले मङ्सिरमा विधान अधिवेशन बोलाउने र यस वर्षको अन्त्यतिर विशेष अधिवेशन गर्ने निर्णय गरेको थियो । तर अभियानको समय एक महिना लम्बिएपछि फागुनमा सारेको हो ।