‘प्रश्न बुझ्नमै अल्झिए ज्ञान कसरी जाँचिन्छ?’—सृष्टि भट्टराई

असोज १५ काठमाडौं । राष्ट्रिय स्वतन्त्र पार्टीकी सांसद सृष्टि भट्टराईले उच्च शिक्षामा प्रश्नपत्र नेपाली र अंग्रेजी दुवै भाषामा उपलब्ध गराउन सरकारको ध्यानाकर्षण गराएकी छन्।
प्रतिनिधि सभाको बैठकमा बोल्दै भट्टराईले परीक्षामा विद्यार्थीको ज्ञान र विषयगत क्षमता परीक्षण हुनुपर्नेमा भाषा बुझ्ने क्षमतामै सीमित हुन नहुने बताइन्।
आफूले हालै मास्टर्स तहको परीक्षा दिएको अनुभव सुनाउँदै उनले परीक्षाका क्रममा छेउमा बसेकी एक विद्यार्थीले प्रश्न नै नबुझेको बताएको उल्लेख गरिन्। त्यसपछि आफूमा पनि ‘परीक्षाले ज्ञान जाँचिरहेको हो कि भाषा बुझ्ने क्षमतारु’ भन्ने प्रश्न उठेको उनको भनाइ थियो।
भट्टराईले नेपालमा अंग्रेजी र नेपाली दुवै भाषाको शिक्षाबीच हुर्किएको पुस्ताले उच्च शिक्षामा भाषाको समस्या भोगिरहेको बताइन्। उनका अनुसार सामुदायिक क्याम्पसमा नेपाली र अंग्रेजी दुवै माध्यमबाट अध्ययन गरेका विद्यार्थी हुने भए पनि कतिपय अवस्थामा प्रश्नपत्र भने अंग्रेजी भाषामै आउने गरेको छ।
उनले भनिन्, “विद्यार्थीले विषय बुझ्ने कि परीक्षा हलमै प्रश्नको अनुवाद गर्नेरु” प्रश्नपत्र बुझ्नै कठिन हुने अवस्थामा विद्यार्थीले आफूले जानेको विषयवस्तु कसरी प्रस्तुत गर्ने भन्ने समस्या उत्पन्न हुने उनको तर्क छ।
सांसद भट्टराईले स्नातक तहमा सम्भव भएको व्यवस्था स्नातकोत्तर तहमा पनि लागू गर्न सकिने बताउँदै भाषा ज्ञान प्रदर्शन गर्ने माध्यम बन्नुपर्ने, ज्ञान हासिल गर्ने क्रममा बाधा बन्न नहुने धारणा राखिन्।
उनले उच्च शिक्षामा विद्यार्थीको भाषिक विविधतालाई ध्यानमा राख्दै प्रश्नपत्र नेपाली र अंग्रेजी दुवै भाषामा उपलब्ध गराउने व्यवस्था गर्न शिक्षा मन्त्रालयको ध्यानाकर्षण गराइन्।