होस्टेलमा शिक्षिकाको शव, पति फरार

साउन १२ ,काठमाडौं । झापाको मेचीनगर नगरपालिका–६ काँकरभिट्टास्थित अरुणोदय इङ्लिस बोर्डिङ स्कुलको होस्टेलमा एक महिला शिक्षक मृत अवस्थामा फेला परेकी छन्। मृतक सर्लाही लालबन्दी–२ घर भएकी २९ वर्षीया कविताकुमारी ढुंगाना रहेको जिल्ला प्रहरी कार्यालय झापाले जनाएको छ।
प्रहरीका अनुसार घटनापछि उनका पति ३० वर्षीय रतन गुप्ता फरार रहेका छन्। गुप्ता पर्साको वीरगञ्ज–१६ निवासी हुन्। अन्तरजातीय विवाह गरेका यी दम्पती गत वैशाखदेखि विद्यालय परिसरभित्रै रहेको होस्टेलमा बस्दै आएका थिए।
जिल्ला प्रहरी कार्यालय झापाका सूचना अधिकारी तथा प्रहरी नायब उपरीक्षक रञ्जन अवालेका अनुसार सोमबार विद्यालयका प्रधानाध्यापक दुर्गाबहादुर लुइँटेलले घटनाबारे प्रहरीलाई जानकारी गराएका थिए। विद्यालय ५ साउनदेखि बन्द रहेकोमा सोमबारदेखि पुनः सञ्चालनमा आएको थियो। तर विद्यालय खुलेको दिन दुवै जना शिक्षक सम्पर्कमा नआएपछि शंका उत्पन्न भएको थियो।
प्रधानाध्यापक लुइँटेलका अनुसार दम्पती बस्ने कोठा बाहिरबाट बन्द अवस्थामा थियो र उनीहरूसँग फोन सम्पर्कसमेत हुन सकेको थिएन। दिनभरि सम्पर्क हुन नसकेपछि साँझ करिब साढे ४ बजे रतन गुप्ताले लुइँटेललाई वाट्सएपमार्फत सन्देश पठाउँदै आफ्नी श्रीमती किचन कोठाभित्र झुन्डिएको अवस्थामा फेला परेको र आफू डरका कारण त्यहाँबाट निस्किएको बताएका थिए।
गुप्ताले सन्देशमा मृतकलाई अर्को कोठामा सारिएको समेत उल्लेख गरेको प्रहरीले जनाएको छ। यद्यपि स्थानीयवासीका अनुसार गुप्ता आइतबार साँझ नै दुई वटा झोला बोकेर विद्यालयबाट बाहिरिँदै गरेको देखिएको थियो, जसले घटनालाई थप रहस्यमय बनाएको छ।
प्रहरी र स्थानीय जनप्रतिनिधिको उपस्थितिमा कोठाको ताला फोडेर हेर्दा कविताको शव खाटमा उत्तानो परेको अवस्थामा दुर्गन्धित रूपमा फेला परेको डीएसपी अवालेले जानकारी दिए। घटनाबारे मृतकका आफन्तलाई जानकारी गराइसकिएको र उनका दाजु झापा आउँदै गरेको जनाइएको छ।
घटनाको अनुसन्धान इलाका प्रहरी कार्यालय काँकरभिट्टाबाट प्रहरी निरीक्षक जसबहादुर लिम्बुको कमाण्डमा अघि बढाइएको छ। फरार रहेका पति रतन गुप्ताको खोजी तीव्र बनाइएको प्रहरीले जनाएको छ।
मृतकको शव पोस्टमार्टमका लागि प्रादेशिक अस्पताल भद्रपुर पठाइएको छ। प्रारम्भिक अनुसन्धान जारी रहेको र पोस्टमार्टम रिपोर्टपछि मृत्युको वास्तविक कारण खुल्ने प्रहरीले जनाएको छ।
यस घटनाले अन्तरजातीय विवाहपछि उत्पन्न हुन सक्ने सामाजिक र पारिवारिक जटिलताबारे पुनः बहस सुरु गराएको छ।