हिन्दू समूहको भ्रमणका क्रममा महिला कर्मचारीलाई हटाइएको आरोपपछि एफिल टावर बन्द

भदौ २३, काठमाडौं । फ्रान्सको राजधानी पेरिसस्थित प्रसिद्ध एफिल टावर महिला कर्मचारीलाई कामबाट अलग गरिएको आरोपमा कर्मचारीहरूले विरोध गरेपछि सोमबार केही समयका लागि बन्द गरिएको छ। हिन्दू धार्मिक संस्था बोचासनवासी अक्षर पुरुषोत्तम स्वामीनारायण संस्था (बीएपीएस) सँग सम्बन्धित करिब १०० सदस्यको टोलीले शनिबार एफिल टावरको भ्रमण गरेका बेला महिला कर्मचारीलाई कार्यस्थलबाट हटाइएको आरोप लागेको हो।

कर्मचारी संघकी प्रतिनिधि डियान डाभोइनका अनुसार धार्मिक समूह टावरको विभिन्न क्षेत्रमा प्रवेश गर्ने क्रममा महिला कर्मचारीलाई आफ्नो कार्यस्थल छाड्न भनिएको थियो र केही स्थानमा उनीहरूको ठाउँमा पुरुष कर्मचारीलाई राखिएको थियो। कर्मचारीहरूले यसलाई लैङ्गिक विभेद र महिलालाई अदृश्य बनाउने प्रयासका रूपमा लिँदै विरोध जनाएका हुन्।

एफिल टावर सञ्चालन गर्ने संस्था एसईटीईले भ्रमणलाई महिलासँगको अन्तरक्रिया सीमित गर्ने गरी व्यवस्थापन गर्न समूहबाट अनुरोध आएको स्वीकार गरेको छ। तर यस्तो व्यवस्था स्वीकार गर्नु नहुने र यो संस्थाको महिला–पुरुष समानताको मूल्य तथा सिद्धान्तसँग मेल नखाने एसईटीईले जनाएको छ।

विरोधका कारण सोमबार कर्मचारीहरू बैठकमा बसेपछि एफिल टावरको सञ्चालन प्रभावित भएको थियो। व्यवस्थापनले कर्मचारीसँग माफीसमेत मागेको जनाइएको छ।

घटनाप्रति पेरिसका मेयर इम्यानुएल ग्रेगोइरले आपत्ति जनाउँदै छानबिन गर्ने बताएका छन्। फ्रान्सेली राष्ट्रिय सभाकी अध्यक्ष याएल ब्राउन–पिभेले पनि विदेशी आगन्तुकको माग पूरा गर्न महिलालाई सार्वजनिक जीवनबाट अलग गर्न नहुने भन्दै घटनाको आलोचना गरेकी छन्।

यता, बीएपीएसले घटनाप्रति दुःख व्यक्त गर्दै विवादमा परेको विषयलाई गम्भीरतापूर्वक लिएको जनाएको छ। ठूलो समूहको भ्रमणका कारण अन्य पर्यटकलाई असुविधा नहोस् भनेर एफिल टावर व्यवस्थापनसँग समन्वय गरिएको संस्थाको भनाइ छ।