पुष १२, काठमाडौँ । शवगृहका एक कर्मचारीले सुशान्तसिंह राजपुतको मृत्यु नभई हत्या भएको कुरा गरेसँगै बहिनी श्वेता सिंहले सीबीआई(केन्द्रीय अनुसन्धान ब्युरो)लाई उक्त घटनाको गहिराइमा गएर छानबिन गर्न अनुरोध गरेकी छन् ।
सन् २०२० मा मुम्बईको अपार्टमेन्टमा मृत फेला परेका सुशान्तको शवलाई पोस्टमार्टमका लागि शवगृमा राखिएको थियो । त्यही शवगृहमा काम गर्दै आएका कर्मचारीले सुशान्तको मृत्यु नभई हत्या भएको कुरा गरेसँगै बलिउडमा फेरि सुशान्तको मृत्यु चर्चामा छ ।
यदि यो व्यक्तिले भनेको कुरा वास्तविक हो भने म सीबीआईलाई यस घटनामा अझै लगनशीलतापूर्वक अनुसन्धान गर्न अनुरोध गर्दछु । तपाईंहरुले निष्पक्ष भएर अनुसन्धान गर्नुहुन्छ भन्नेमा हामी विश्वस्त छौं, श्वेताले सामाजिक सञ्जाल इन्स्टाग्राममा लेखेकी छन्, घटनाको सत्यता नजिक पुग्न नसकेकोले अझै हाम्रो मन दुखिरहन्छ ।
टिभी नाइन मराठीसँगको एक अन्तरवार्तामा शवगृहका कर्मचारी रुपकुमार शाहले भनेका थिए,ुसुशान्तको मृत्युपछाडि शवगृहमा पाँचवटा मृत शरीर ल्याइएको थियो । हामीलाई त्यसमध्येमा भीआईपीको शरीर पनि रहेको कुरा जनाइएको थियो । तर, त्यो शरीर सुशान्तको हो भन्ने हामीलाई थाहा थिएन । तर, जब मैले सुशान्तको शरिर देखें मैले मेरो सिनियरलाई यो त मृत शरीर होइन हत्या गरिएको हो भनें । त्यसैले हामीले त्यही अनुसारले काम गर्नुपर्छ भनेँ ।
तिमी आफ्नो काम गर म आफ्नो गर्छुु भन्ने जवाफ आएपछि रुपकुमार शरीर काटेर सिलाउनतिर लागे । त्यो पोस्टमार्टमको पूरा भिडियो खिच्न जरुरी थियो । तर, मेरो सिनियरले फोटोको काम सकेर शवलाई सकेसम्म हस्तान्तरण गर्न चाहेको कुरा गर्नुभयो । त्यसैले हामले रातमा पोस्ट मार्टम गर्यौं,उनले भनेका छन् ।
सुशान्तको कपडा खोलिदिँदा शरीरमा चोट पटक देखा परेकोसमेत उनले अन्तरवार्तामा खुलाएका छन् । मारपिटकै कारण हात र गोडा भाँचिएको हुनसक्नेसमेत अन्तरवार्तामा दाबी गरेका छन् । सीबीआईले यसअघि भने सुशान्तको मृत्युलाई आत्महत्याको करार गरिदिएको थियो ।