सडकमा हिँडिरहेका महिलालाई पछ्याउँदै दुर्व्यवहार गरेको आरोपमा कीर्तिपुरबाट तीन जना पक्राउ

सडकमा हिँडिरहेका महिलालाई पछ्याउँदै फोन नम्बर माग्ने तथा अश्लील शब्द प्रयोग गरी दुर्व्यवहार गरेको आरोपमा प्रहरीले काठमाडौंको कीर्तिपुरबाट तीन जनालाई पक्राउ गरेको छ।

पक्राउ पर्नेमा बाजाङको केदारस्युँ गाउँपालिकाका २२ वर्षीय सत्यराज खत्री, हाल कीर्तिपुर बस्दै आएका; कञ्चनपुरका २२ वर्षीय ललित दमाई र कञ्चनपुरको कृष्णपुर–३ का २१ वर्षीय अशोक भण्डारी रहेका छन्। भण्डारी पनि हाल कीर्तिपुरमै बस्दै आएको प्रहरीले जनाएको छ।

प्रहरीका अनुसार भदौ १२ गते साँझ कीर्तिपुरको भंगाल क्षेत्रमा उनीहरूले सडकमा हिँडिरहेका महिलालाई मोटरसाइकलमा पछ्याएका थिए। त्यस क्रममा महिलाहरूसँग फोन नम्बर माग्नुका साथै अश्लील तथा आपत्तिजनक शब्द प्रयोग गरी दुर्व्यवहार गरेको आरोप छ।

उनीहरू सुदूरपश्चिम प्रदेश–००४ प ८७८ नम्बरको मोटरसाइकलमा सवार रहेको बताइएको छ। घटनाका क्रममा पीडित महिलाहरूले उनीहरूको गतिविधि भिडियोमा रेकर्ड गरी सामाजिक सञ्जालमा सार्वजनिक गरेपछि घटना प्रहरीको जानकारीमा आएको थियो।

सामाजिक सञ्जालमा भिडियो सार्वजनिक भएपछि प्रहरीले घटनाबारे अनुसन्धान अघि बढाएको थियो। अनुसन्धानका क्रममा प्रहरीले उनीहरूलाई आइतबार कीर्तिपुरस्थित विष्णुदेवी मन्दिर क्षेत्रबाट पक्राउ गरेको हो।

जिल्ला प्रहरी परिसर काठमाडौंका प्रहरी उपरीक्षक दानबहादुर थापाका अनुसार पक्राउ परेका तीनै जनामाथि घटनाबारे थप अनुसन्धान भइरहेको छ।