श्रीलंकामा महिला रोजगारी बढाउन ‘केयर इकोनोमी’मा लगानीको माग

भदौ ९ , काठमाडौं । श्रीलंकामा महिलाको रोजगारी र आर्थिक सहभागिता बढाउन ‘केयर इकोनोमी’ अर्थात् हेरचाहसम्बन्धी सेवा क्षेत्रमा लगानी बढाउनुपर्नेमा जोड दिइएको छ।

श्रीलंकामा काम गर्ने उमेरका करिब ७५ प्रतिशत महिला श्रम बजारबाट बाहिर रहेको र यसको प्रमुख कारण बालबालिका, वृद्धवृद्धा तथा परिवारका अन्य सदस्यको हेरचाहको जिम्मेवारी रहेको अध्ययनहरूले देखाएका छन्।

यसै सन्दर्भमा महिला सांसद, सरकारी अधिकारी, नागरिक समाज, अनुसन्धानकर्ता तथा कूटनीतिज्ञबीच भएको छलफलमा बाल हेरचाह, वृद्धवृद्धाको हेरचाह, अपांगता भएका व्यक्तिका लागि सहयोग तथा सामाजिक सुरक्षामा लगानी बढाउनुपर्नेमा जोड दिइएको हो।

अन्तर्राष्ट्रिय श्रम संगठनका अनुसार श्रीलंकाको केयर क्षेत्रमा एक अमेरिकी डलर लगानी गर्दा ७.७६ डलर प्रतिफल प्राप्त हुन सक्छ। त्यसैले हेरचाह क्षेत्रमा लगानी सामाजिक आवश्यकता मात्र नभई आर्थिक वृद्धिको रणनीतिसमेत भएको सहभागीहरूको भनाइ छ।

प्रधानमन्त्री हरिणी अमरसूर्याले हेरचाहको जिम्मेवारीलाई निजी विषयका रूपमा मात्र हेर्न नहुने बताउँदै यसलाई सामाजिक तथा आर्थिक जिम्मेवारीका रूपमा लिनुपर्नेमा जोड दिइन्। सस्तो र सहज बाल हेरचाह, प्रारम्भिक बाल शिक्षा, वृद्ध हेरचाह, अपांगता सहयोग र सामाजिक सुरक्षा विस्तारले महिलाको श्रम सहभागिता बढाउन सक्ने उनको भनाइ छ।

छलफलमा संसद्ले केयर क्षेत्रमा प्रत्यक्ष लगानी, श्रमसम्बन्धी कानुनी सुधार र लैंगिक समानतालाई ध्यानमा राखेर बजेट निर्माण गर्नुपर्ने विषयमा पनि जोड दिइएको थियो।

महिला सांसदहरूको समूहले आगामी सरकारी बजेटमा लैंगिक उत्तरदायी बजेट प्रणालीमार्फत केयर इकोनोमीलाई प्राथमिकता दिने विषयलाई अघि बढाउने जनाएको छ।