व्यवसायमा लैङ्गिक समानता प्रवर्द्धन

साउन १२ ,काठमाडौं । व्यवसायिक क्षेत्रमा लैङ्गिक समानता सुदृढ गर्ने उद्देश्यले संयुक्त राष्ट्रसंघीय निकाय यूएन वुमन नेपालले यूएन ग्लोबल कम्प्याक्ट नेपालसँग सहकार्य गर्दै एक विशेष प्रशिक्षण कार्यक्रम आयोजना गरेको छ। कार्यक्रममा महिला सशक्तीकरण सिद्धान्तमा आबद्ध विभिन्न व्यवसायिक संस्थाका प्रतिनिधिहरू सहभागी भएका थिए।
उक्त प्रशिक्षण कार्यक्रममा ‘जेंडर ग्याप एनालिसिस टुलको प्रयोगबारे व्यावहारिक अभ्यास गराइएको थियो। यस उपकरणमार्फत संस्थाहरूले आफ्ना कार्यस्थलमा रहेको लैङ्गिक असमानताको अवस्था मूल्याङ्कन गर्न र त्यसलाई न्यूनीकरण गर्ने ठोस रणनीति पहिचान गर्न सक्नेछन्।
कार्यक्रममा सहभागीहरूलाई ध्भ्एक का सिद्धान्तहरूको परिचय गराइनुका साथै कार्यस्थलमा समान अवसर सुनिश्चित गर्न अपनाउनुपर्ने नीति तथा अभ्यासबारे विस्तृत जानकारी दिइएको थियो। व्यावहारिक अभ्यास, अन्तरक्रियात्मक छलफल तथा प्रश्नोत्तर सत्रमार्फत सहभागीहरूले सिकेका कुरालाई आफ्ना संस्थामा कसरी कार्यान्वयन गर्ने भन्ने विषयमा स्पष्ट मार्गदर्शन पाएका थिए।
आयोजकका अनुसार, निजी क्षेत्रले लैङ्गिक समानता प्रवर्द्धनमा महत्वपूर्ण भूमिका खेल्न सक्छ। त्यसका लागि प्रतिबद्धतालाई व्यवहारमा रूपान्तरण गर्नु आवश्यक रहेकोमा जोड दिइएको थियो। कार्यक्रममा सहभागी संस्थाहरूले समान अवसर, समावेशी वातावरण र सुरक्षित कार्यस्थल निर्माणतर्फ सक्रिय रूपमा अघि बढ्ने प्रतिबद्धता व्यक्त गरेका छन्।
यस पहलले नेपालमा निजी क्षेत्रलाई थप जिम्मेवार र समावेशी बनाउँदै महिला तथा पुरुष दुवैका लागि समान अवसर सुनिश्चित गर्ने दिशामा महत्वपूर्ण योगदान पुर्‍याउने विश्वास गरिएको छ। आयोजकहरूले ‘लैङ्गिक समानता केवल सिद्धान्त मात्र नभई व्यवहारमा कार्यान्वयन गर्नुपर्ने अभ्यास हो’भन्ने सन्देशसमेत दिएको छ।