लकडाउन अब बैशाख १५ सम्म

बैशाख २, काठमाण्डौ । सरकारले लकडाउनलाई बढाएर बैशाख १५ गतेसम्म पुर्याउने निर्णय गरेको छ । 

केहीबेरअघि बालुवाटारमा बसेको मन्त्रीपरिषद बैठकले कोरोना संक्रमितको संख्या बढ्न थालेको र अवस्था जटिल बन्दै गएको विश्लेषणसहित लकडाउनको अवधि १२ दिनले बढाएर बैशाख १५ सम्म कायम गर्ने निर्णय गरेको हो । 

कोरोना भाइरसको नियन्त्रण तथा रोकथामका लागि सरकारले लकडाउनको अवधि लम्ब्याउने घोषणा गरेको यो तेश्रोपटक हो । यसअघि चैत १७ गते र चैत २३ गते लकडाउनको अवधि बढाउने निर्णय गरिएको थियो । 

सरकारले संभावित संक्रमण र महामारीलाई रोक्ने उद्देश्यले चैत ११ गतेदेखि लकडाउन घोषणा गरेको थियो । सुरुमा चैत १८ गतेसम्म मात्र लकडाउन लगाइएको थियो । तर, त्यसपछि लकडाउनको अवधिलाई फेरि लम्ब्याएर चैत २५ गतेसम्म पुर्याइयो । 

प्रधानमन्त्री केपी शर्मा ओलीले त्यसपछि देशबासीको नाममा सम्बोधन गर्दै अबका २ साता जोखिमपूर्ण रहेका भन्दै धैर्य गर्न र सरकारका कदममा साथ दिन नागरिकहरुमा आह्वान गरे । उनले आफ्नो सम्बोधनमा नै लकडाउनको अवधि कम्तीमा २ साता बढ्ने प्रष्ट संकेत गरिसकेका थिए । 

यही संकेत अनुसार सरकारले बैशाख ३ गतेसम्म जारी लकडाउनलाई बढाएर बैशाख  १५ गतेसम्मलाई बनाएको हो । 

सरकारले लकडाउनको अवधि लम्ब्याउनु पछाडिको अर्को महत्वपूर्ण कारण भारत सरकारसँगको सहकार्य पनि हो । त्यहाँ प्रधानमन्त्री नरेन्द्र मोदी र नेपालका प्रधानमन्त्री केपी शर्मा ओलीबीच कोरोनाविरुद्धको लडाईमा एकअर्का देशबीच सहकार्य गरेर अगाडि बढ्ने यसअघि नै सहमति बनिसकेको छ । 

नेपालको निकै ठूलो क्षेत्र भारतसँगको खुल्ला सीमानासँग जोडिएका कारण र भारतमा लकडाउनको अवधिमै कोरोना संक्रमितको संख्या बढेर १० हजार नजिक पुगिसकेको अवस्थामा नेपालले भारतको निर्णयसँग मिल्ने गरी आफ्नो रणनीति बनाउनुभन्दा अर्को विकल्प नरहेको सरकारकै मन्त्रीहरु बताउँछन् ।