रौतहटमा उपचारको क्रममा २ वर्षीय सचिन पटेलको मृत्यु, स्वास्थ्यकर्मी पक्राउ

असार १४,काठमाडौं ।रौतहटको गरुडा नगरपालिकामा क्लिनिकमा उपचार गर्न लैजाँदा २ वर्षीय बालकको मृत्यु भएको छ । गरुडा नगरपालिका–९ स्थित गमहरियामा संचालित ‘ओम क्लिनिक’मा उपचारको क्रममा सचिन पटेलको मृत्यु भएको हो ।

देवाहीगोनाही नगरपालिका–४ घर भएका शिवशंकर पटेलका छोरा सचिनलाई ज्वरो आएपछि परिवारले ‘ओम क्लिनिक’मा लगेका हुन् । क्लिनिक सञ्चालक गणेश सहनीले बालकलाई सिरिन्ज लगाई दिएका थिए । ‘एकछिनमा ठिक हुन्छ’ भनेर सहनीले भनेपनि बालकको स्वास्थ्य अवस्था झन् बिग्रिएसँगै परिवारले उनलाई अनामिका अस्पतालमा लाँदै थिए । अनामिकामा पुग्नासाथ चिकित्सकले बालकलाई मृत घोषण गरे ।

ओम क्लिनिक’का संचालकले सिरिन्ज लगाएका कारण बालकको मृत्यु भएको परिवारको आरोप छ । अनुसन्धानका लागी क्लिनिक सञ्चालक गणेश सहनीलाई पक्राउ गरिएको इलाका प्रहरी कार्यालय गरुडाका डिएसपी ओमप्रकाश खनालले रातोपाटीलाई बताए ।

डिएसपी खनालले भने,‘बालकको शव पोष्टमार्टमा गर्न प्रादेशिक अस्पतालमा पठाएका छौं, आवश्यक अनुसन्धान हुँदै छ ।’ 

स्थानीय स्तरमा चिकित्सक भनेर चिनिएका गणेश चिकित्सक होइनन् । उनले कस्तो सिरिन्ज लगाएका हुन् भन्नेबारे प्रहरीले चिकित्सकको सहयोगमा अनुसन्धान गरिरहेको छ । सहनिले आफ्नै घरमा क्लिनिक सञ्चालन गरेका छन् ।

रातोपाटी