रसुवा बाढीपीडितको उद्धारमा पूर्ण क्षमता लगाउन सांसद तामाङको माग

भदौ १० , काठमाडौं । सत्तारुढ राष्ट्रिय स्वतन्त्र पार्टीकी सांसद बसुमाया तामाङले रसुवाको भोटेकोसीमा आएको बाढीबाट प्रभावित नागरिकको तत्काल खोजी तथा उद्धारमा सरकारलाई पूर्ण क्षमता परिचालन गर्न माग गरेकी छन्।

प्रतिनिधिसभाको बुधबारको बैठकमा बोल्दै सांसद तामाङले हेलिकोप्टरसहितका उद्धार टोली परिचालन गरी सम्पर्कविहीन नागरिक तथा सुरक्षाकर्मीको अविलम्ब खोजी गर्न आग्रह गरिन्।

उनले घरबारविहीन भएका बाढीपीडितका लागि निःशुल्क खानपिन, अस्थायी आवास र घाइतेको निःशुल्क उपचारको व्यवस्था गर्न सरकारसँग माग गरिन्।

बाढीबाट क्षतिग्रस्त सडक तथा बगेका पुलका कारण रसुवा, नुवाकोट र धादिङको सडक सम्पर्क प्रभावित भएकाले बेलिब्रिज तथा वैकल्पिक मार्ग तत्काल सञ्चालन गर्नुपर्ने उनको भनाइ छ।

सांसद तामाङले जनधन तथा पूर्वाधारमा भएको क्षतिको मूल्यांकन गर्न उच्चस्तरीय टोली गठन गरी पीडितका लागि दीर्घकालीन पुनःस्थापना र उचित क्षतिपूर्तिको प्याकेज घोषणा गर्नसमेत माग गरिन्।

उनले त्रिशूली र भोटेकोसी नदी किनारका नुवाकोट, रसुवा र चितवनका नागरिकलाई नदीको बहाव नघटेसम्म सुरक्षित स्थानमा बस्न आग्रह गरेकी छन्।