महिलालाई घरमै सीमित राख्नुपर्ने धर्मगुरुको टिप्पणी, भारतमा विवाद

भदौ १५ , काठमाडौं । भारतको केरलाका इस्लामिक धर्मगुरु कान्तापुरम एपी अबुबकर मुसलियारले महिलालाई घरमै सीमित राख्नुपर्ने र सार्वजनिक कार्यक्रममा उनीहरूको उपस्थितिले ‘ठूलो विनाश’ निम्त्याउन सक्ने टिप्पणी गरेपछि विवाद चर्किएको छ।

कोच्चिमा आयोजित एक इस्लामिक सम्मेलनमा बोल्दै ९५ वर्षीय मुसलियारले इस्लामले महिलाका लागि पर्दा प्रणाली तोकेको र महिलाले सार्वजनिक क्षेत्रमा उपस्थित हुन नहुने बताएका हुन्।

उनको अभिव्यक्तिको भारतका विभिन्न राजनीतिक दल तथा नेताहरूले आलोचना गरेका छन्। भारतीय कम्युनिस्ट पार्टी ९मार्क्सवादी० नेतृ पीके श्रीमतीले टिप्पणीलाई अपमानजनक भन्दै तत्काल फिर्ता लिन माग गरेकी छन्।

सीपीआई९एम० नेतृ केके शैलजाले महिलालाई घरमै सीमित राख्ने धारणा ‘सामन्ती प्रथा’ भएको टिप्पणी गरेकी छन्।

त्यस्तै, केरलाका भाजपा प्रमुख राजीव चन्द्रशेखरले महिलालाई स्वतन्त्र रूपमा शिक्षा हासिल गर्ने, नेतृत्व गर्ने, सपना देख्ने र सार्वजनिक जीवनमा सहभागी हुने संवैधानिक अधिकार रहेको बताएका छन्। उनले महिलामाथि धर्मगुरुको आदेश थोपर्ने प्रयासको विरोध गरेका छन्।

मुसलियारले यसअघि पनि महिलासम्बन्धी विवादास्पद अभिव्यक्ति दिँदै आएका छन्। सन् २०१५ मा उनले लैंगिक समानताबारे टिप्पणी गरेका थिए भने सन् २०१९ मा नागरिकता संशोधन कानुनविरुद्ध महिलाहरू सडकमा उत्रिएको विषयमा समेत आलोचना गरेका थिए।