भारतमा अब ३० अप्रीलसम्म लकडाउन, नेपालमा पनि बैशाख १८ सम्म रहनसक्ने

चैत ३०,काठमाण्डौ । भारतीय प्रधानमन्त्री नरेन्द्र मोदीसँग भिडियो कन्फरेन्सपछि भारतका चार राज्यले लकडाउनलाई बढाएर ३० अप्रीलसम्म पुर्याउने घोषणा गरेका छन् । 

प्रधानमन्त्रीसँगको छलफलपछि ती राज्यहरुले १४ अप्रीलसम्म कायम लकडाउनलाई बढाएर ३० अप्रीलसम्म पुर्याउनुलाई भारतीय मिडियाहरुले केन्द्र सरकारले समेत लकडाउनलाई लम्ब्याएर ३० अप्रीलसम्मै पुर्याउने संकेत भनी लेखेका छन् । 

पञ्जाब, ओडिसा, महाराष्ट तथा पश्चिम बंगाल राज्य सरकारले लकडाउनको अवधि बढाएर ३० अप्रीलसम्म कायम हुने घोषणा गरेका हुन् । 

प्रधानमन्त्रीसँग छलफललगत्तै दिल्लीका मुख्यमन्त्री अरविन्द केजरीवालले एक ट्वीटमार्फत लकडाउन बढाउने निर्णय नै भएको दाबी गर्दै त्यसको स्वागत गरेका थिए । भारतमा कोरोना संक्रमण बढिरहेकोले अहिलेको अवस्थामा लकडाउनको अवधि बढाउनुबाहेकको अर्को विकल्प नभएको अरविन्द केजरीवालले बताएका थिए । 

प्रधानमन्त्री नरेन्द्र मोदीसँगको छलफलमा अधिकांश राज्यका मुख्यमन्त्रीहरुले लकडाउन बढाउन सुझाव दिएका थिए । 

त्यहाँको केन्द्र सरकारले पनि राज्य सरकारहरुको सुझावको आधारमा लकडाउनलाई अप्रीलसम्म जारी राख्ने निर्णय गर्ने तयारी गरिरहेको बताइएको छ । 

नरेन्द्र मोदीले १२ वा १३ अप्रील भारतबासीलाई सम्बोधन गर्दै लकडाउन लम्ब्याउने विशेष घोषणा गर्नसक्नेछन् । 

भारतमा कोरोना संक्रमितको संख्या ८ हजार पुग्न लागिसकेको छ । मृत्यु हुने संक्रमितको संख्या पनि २४९ पुगिसकेको छ । 

लकडाउनपछि नै भारतमा कोरोना संक्रमितको संख्या बढिरहेका कारण तत्काल लकडाउन खोल्ने जोखिम भारत सरकारले नलिएको देखिएको छ । 

भारतसँग नेपालको खुल्ला सीमा छ । केही मुख्य नाकाहरुबाट आवतजावत बन्द गरिए पनि नेपाल भारत सीमामा धेरै ठूलो संख्यामा चोर बाटोहरु छन्, जहाँबाट भारतका नागरिक सजिलै नेपाल प्रवेश गर्न सक्छन् । यहीकारण समेत भारतमा कोरोना संक्रमितको संख्या ह्वात्तै बढिरहँदा नेपालले पनि लकडाउनको अवधि बढाउनुको विकल्प देखिन्न । 

भारतले अप्रील ३० सम्म लकडाउन बढायो भने नेपालले समेत सो अवधिसम्म लकडाउन गर्नुपर्ने हुन्छ । यसको अर्थ नेपाल सरकारले अब कम्तीमा पनि लकडाउन २ हप्ता लम्ब्याउनेछ । जसको पूर्व संकेत प्रधानमन्त्री ओलीले दिइसकेका छन् । 

उनले शनिवार सातै प्रदेशका मुख्यमन्त्रीसँग भिडियो कन्फरेन्स गर्दै लकडाउन बढ्ने प्रष्ट भनिसकेका छन् । मुख्यमन्त्रीहरुले पनि लकडाउनलाई अझै कडाई गर्दै लम्ब्याउनुको विकल्प नरहेको सुझाव दिइसकेका छन् । 

नेपालमा चैत ११ गतेदेखि जारी लकडाउन बैशाख ३ गतेसम्म रहने यसअघि निर्णय भइसकेको छ । बैशाख १ वा २ गते बस्ने मन्त्रीपरिषद बैठकले लकडाउन लम्ब्याउने विषयमा निर्णय गर्न सक्नेछ ।