भारतबाट आएका रौतहटका २ युवकमा कोरोना पुष्टि

बैशाख १६, काठमाण्डौ । रौतहटका दुई युवकमा कोरोना भाइरसको संक्रमण पुष्टि भएको छ । 

राष्ट्रिय जनस्वास्थ्य प्रयोगशाला टेकुमा गरिएको परीक्षणको क्रममा दुई युवकमा कोरोना संक्रमण पुष्टि भएको हो । 

उनीहरु दुवैजना केही दिनअघि भारतबाट आएका समेत खुलेको छ । 

संक्रमितमध्ये एकजना बृन्दावन नगरपालिकाका २४ वर्षीय युवक रहेका स्वास्थ्य मन्त्रालयले जनाएको छ । उनी गत चैत २२ गते कोलकाताबाट नेपाल आएका समेत खुलेको छ । 

ती युवकको जनकपुरस्थित प्रयोगशालामा गरिएको पीसीआर परीक्षणमा नेगेटिभ रिपोर्ट आएको थियो । तर, काठमाडौंमा गरिएको परीक्षणबाट भने पोजिटिभ रिपोर्ट आएको हो । 

यस्तै, अर्का संक्रमित युवक देवाही गोनाही नगरपालिका १ निवासी ३५ वर्षीय पुरुष हुन्। उनी भने वैशाख ४ गते दिल्लीबाट नेपाल आएका थिए। 

दुबै संक्रमितको स्वास्थ्य अवस्था सामान्य छ।

रौतहटका यी दुई युवकमा कोरोना पुष्टि भएसँगै अब नेपालमा संक्रमितको संख्या ५४ पुगेको छ । यीमध्ये १६ जना निको भएर घर फर्किसकेका छन् ।