बाढीबाट रसुवा–नुवाकोटका १ लाख ५७ हजार महिला–बालिका प्रभावित

भदौ १५ , काठमाडौं । गत अगस्ट २६ मा नेपालमा आएको विनाशकारी बाढीबाट रसुवा र नुवाकोटका करिब १ लाख ५७ हजार ५० जना महिला तथा बालिका प्रत्यक्ष तथा अप्रत्यक्ष रूपमा प्रभावित भएका छन्।

यूएन वुमनले सार्वजनिक गरेको पहिलो लैंगिक चेतावनी प्रतिवेदनअनुसार बाढीपछि महिला तथा बालिकामा हिंसा, शोषण, भोकमरी, मानव बेचबिखन र स्वास्थ्य सेवाबाट वञ्चित हुने जोखिम बढेको छ।

बाढीबाट हालसम्म ५०० भन्दा बढीको मृत्यु, करिब १ हजार जना बेपत्ता तथा झण्डै १० हजार घर बगेको जनाइएको छ। प्रभावित क्षेत्रमा खाद्यान्न र खानेपानीको अभावसँगै स्वास्थ्य तथा संरक्षण सेवासमेत प्रभावित भएका छन्।

यूएन वुमन नेपाल प्रतिनिधि प्याट्रिसिया फर्नान्डेज–पाचेकोले विपद्का बेला महिला तथा बालिकामाथि विद्यमान जोखिम अझ बढ्ने बताएकी छन्।

प्रतिवेदनअनुसार रसुवा, नुवाकोट, धादिङ, गोरखा र चितवनमा करिब तीनमध्ये एक महिला निरक्षर छन्। यसले राहतसम्बन्धी सूचना प्राप्त गर्न, दर्ता प्रक्रिया पूरा गर्न तथा सहायता दाबी गर्न थप कठिनाइ हुनसक्ने जनाइएको छ।

यूएन वुमनले महिला तथा बालिकालाई राहत, संरक्षण र पुनःस्थापनामा सहयोग गर्न २० लाख अमेरिकी डलर आवश्यक रहेको जनाएको छ। साथै, तत्काल खाद्य सहायता उपलब्ध गराउनुका साथै महिलाको नेतृत्व र जीविकोपार्जनमा सहयोग पुर्‍याउने उद्देश्यले महिला नेतृत्वको सामुदायिक भान्सा कार्यक्रम सञ्चालनका लागि स्रोत परिचालन गरिरहेको छ।