पैसा तिर्न नसक्दा अस्पतालमै अलपत्र

असार २७, काठमाडौं। बर्जनधारा- १ साधुटारकी ६४ बर्षकी टीकादेवी लिम्बूको डेढ महिनादेखि  अस्पतालमै बास छ । जेठ १२ मा छिमेकी ६९ वर्षीया बिर्खवहादुर योङहाङ लिम्बूले खुकुरी प्रहार गर्दा घाइते भएकी उनलाई उपचारका लागि बिर्तामोडस्थित मनमोहन अस्पतालमा भर्ना गरिएको थियो । 
 

भर्ना भएको आठौं दिनमा अस्पतालले'डिस्चार्ज' दिए पनि उपचार र औषधी खर्च चुक्ता नगरी उनलाई घर जान दिएको छैन । चौपायाले मकै खाएको सामान्य विवाद थियो, छिमेकी बिर्ख वहादुरले उनि माथि खुकुरी प्रहार गरेका थिए। 'राति सुत्ने सुरसारमा थिएँ,' टिकादेविले घटना सुनाइन् , 'मेरोपाडोले तेरो के खायो रे? भन्दै खुकुरीले हाने ।' खुकुरीको  प्रहार रोक्ने क्रममा देब्रे हातको नाडीमा गम्भीर चोट लाग्यो ।

हातको नसा काटिएकाले उनी बेहोस भइन् । आफन्तको सहयोगमा राति १ बजे अस्पतालमा भर्ना गरिएको थियो । बिर्खवहादुर फरार भए । उनलाई पक्राउ गरि इलाका प्रहरी कार्यलयल बिर्तामोडले ज्यान मार्ने मुद्दा चलएको छ। विपन्न परिवारकी टीकामाया भने खर्च तिर्न नसक्दा घर फर्कन सकेकी छैनन् ।