जेठ ८, काठमाडौं । राष्ट्रिय स्वतन्त्र पार्टीकी सांसद डा. चन्दा कार्कीले पाठेघरको क्यान्सरबाट महिलाहरूलाई बचाउनका लागि एचपीभी (ह्युमन प्यापिलोमा भाइरस) खोपको व्यवस्था गर्न माग गरेकी छन् । उनले एचपीभी खोपलाई' राष्ट्रिय खोप कार्यक्रमुमा समावेश गर्न पनि माग गरेकी छन् ।
प्रतिनिधिसभाको आइतबारको बैठकमा सांसद कार्कीले पाठेघरको क्यान्सरबाट ठूलो संख्यामा महिलाहरू पीडित भएको र ज्यान गुमाउने भएकाले सरकारले एचपीभी खोपको व्यवस्था गर्नुपर्ने माग गरेकी हुन् । 'पाठेघरको मुखको क्यान्सर उन्मूलन गर्न राज्यले जनचेतना बढाउने, हाम्रो राष्ट्रिय खोप कार्यक्रममा एचपीभी भ्याक्सिनलाई चाँडोभन्दा चाँडो समावेश गरियोस् भनी सम्बन्धित निकायसँग जोडदार माग राख्न चाहन्छु,' उनले भनिन्,'यसो भयो भने विश्व स्वास्थ्य संगठनले सन् २०३० सम्ममा यस क्यान्सरबाट मुक्ति पाउन लिएको लक्ष्यमा हामी पुग्न सक्ने छौं ।'
सांसद कार्कीले महिलाहरूमा हुने पाठेघरको मुखको क्यान्सरको समयमै पहिचान र उपचार गर्नु आवश्यक रहेको पनि बताइन् । उनले भनिन्, 'राज्यले यसका लागि अझै पनि मास स्क्रिनिङ कार्यक्रम नराखेको र भ्याक्सिनको व्यवस्था पनि नगरेकाले हामीकहाँ हरेक वर्ष करिब २ हजार ३ सय महिलाहरू सिकार भइराखेका छन् ।' उनले बर्सेनि उक्त क्यान्सरबाट १ हजार ५ सय महिलाहरूले उक्त रोगका कारण ज्यान गुमाइरहेको पनि दाबी गरिन् । एचभीपी खोपको व्यवस्था गरेमा पाठेघरको क्यान्सर लागेका महिलाहरूको संख्यामा उल्लेख्य कमी हुने उनको भनाइ थियो ।