नेपालमा थप ३३१ जनामा कोरोना संक्रमण, ८६०५ पुगे संक्रमित

असार ६, काठमाडौँ । नेपालमा शनिवार ३३१ जना कोरोनाभाइरस सङ्क्रमित थपिएको स्वास्थ्य तथा जनसङ्ख्या मन्त्रालयका प्रवक्ता डा। जागेश्वर गौतमले जानकारी दिएका छन्।

सङ्क्रमित हुनेमा पुरुषको सङ्ख्या अत्यधिक रहेको छ।

कोरोनाभाइरसको पछिल्लो सङ्क्रमणबारे स्वास्थ्य मन्त्रालयले शनिवार दिएको जानकारी अनुसार ७,८४९ पुरुष र ७५६जना महिला सङ्क्रमित भएका छन्।हालसम्म १,५७८ जना कोरोनाभाइरस सङ्क्रमण भएर निको भएको डा। गौतमले नियमित पत्रकार सम्मेलनमा जानकारी दिएका छन्।

पछिल्लो समय हरेक दिन सयौँको सङ्ख्यामा भाइरस सङ्क्रमितको सङ्ख्या बढ्दै गएको छ।गत चौबीस घण्टामा ७,४१६ को पीसीआर परीक्षण र ४,४२६ को आरडीटी परीक्षण गरेको बताइएको छ।

सरकारले हालसम्म पीसीआर प्रविधिबाट १,६९,१६५जनाको स्वाब जाँचिएको जनाएको छ।

त्यसैगरी आरडीटी प्रविधिबाट २,५२,३०० जनाको परीक्षण गरिएको छ।देशभर गरी क्वारन्टीनमा एक लाख भन्दा बढी मानिसहरू रहेका छन्।

त्यसैगरी ७,००५ जना आइसोलेशनमा रहेको जनाइएको छ।

बीबीसी