नेतृ उमा भुजेलको प्रश्न : मौलिक अधिकार कार्यान्वयनमा कसले रोकेको छ ?

साउन १४, काठमाडौं । नेपाल कम्युनिष्ट पार्टी (नेकपा) की नेतृ उमा भुझेलले समाजवाद उन्मुख भनेर संविधानमै लेखिएपनि कार्यान्वयनको पक्ष फितलो भएको बताएकी छन् ।

आइतबार ललितपुरमा समाजवादी विद्यार्थी मोर्चाले आयोजना गरेको ‘समाजवाद र समाजवादी शिक्षाका आधार’ विषयक अन्तरक्रियामा बोल्दै भुजेलले संविधानमा मौलिक अधिकारका कुरा स्पष्ट लेखिएपनि कतिपय कुरा कार्यान्वयन नभएको भन्दै असन्तुष्टि जनाएकी हुन् । 

‘शिक्षा, स्वास्थ्य, रोजगार मौलिक अधिकार भनेर लेखिएको छ त्यो लागु गर्न कसले रोकेको छ ? अथवा निःशुल्क भनिएको छ त्यो लागु गर्न कसले रोकेको छ ?’, भुजेलको प्रश्न छ ।  उनले शिक्षाका सवालमा संविधानमा लेखिएको कुरा लागु हुन के कुराले रोकेको छ भनेर गम्भीर भएर सोच्नुपर्ने जानकारी दिईन् । 

समाजवादउन्मुख कानुन, संविधान र राज्यप्रणाली भनिएको छ तर कार्यक्रम पुँजीवादी छ । व्यवस्था दलाल पुँजीवादी व्यवस्था छ । कानुन पनि दलाल पुँजीवादलाई सेवा गर्ने छ ।  उनले अहिलेको शिक्षा प्रणालीले वर्ग पैदा गर्ने भन्दै गरिबहरूले लाखौँ लाख तिरेर पढ्न नसक्ने अवस्था रहेकाले शिक्षा कतिपयका लागि व्यापार बनेको बताइन् । उनले श्रम र उत्पादनसँग शिक्षा जोडिनुपर्ने आवश्यकता रहेको भन्दै अहिलेको शिक्षा प्रणालीको अन्त्य गर्न जरुरी रहेको बताइन् ।