देवानगञ्ज घटनापछि मन्त्री मेहताको स्थलगत अनुगमन, राहत र क्षतिपूर्तिको प्रतिबद्धता

साउन १९ , काठमाडौं । स्वास्थ्य तथा खाद्य स्वच्छता मन्त्री निशा मेहताले सुनसरीमा आन्दोलनका क्रममा भएको आगजनी र तोडफोडबाट प्रभावित क्षेत्रहरूको स्थलगत निरीक्षण गर्दै पीडितलाई राहत, पुनर्स्थापना र क्षतिपूर्ति दिलाउने प्रतिबद्धता व्यक्त गरेकी छन्।
गोलीकाण्डपछि उत्पन्न विवाद र आन्दोलनबाट भएको क्षतिको अवस्थाबारे बुझ्न मन्त्री मेहताले देवानगञ्ज महानगरपालिका–३, कप्तानगञ्ज पुगेर अनुगमन गरेकी हुन्। उनले प्रभावित घरपरिवार, व्यवसायी, प्रत्यक्षदर्शी तथा स्थानीयसँग भेटघाट गर्दै क्षतिको यथार्थ विवरण लिएकी छन्।
अनुगमनको पहिलो दिन टोलीले कोसी कटान क्षेत्र, फुलचोकस्थित ब्रदर हार्डवेयर, भोक्राहा–चिरौली चोकमा रहेको बेचन सहको पान पसल तथा बुमिङ पसल, साथै इनरुवा–४ मा रहेको हैदर मन्सुरीको मोटरसाइकल ग्यारेज लगायतका स्थानको निरीक्षण गरेको थियो। त्यहाँ भएका आगजनी र तोडफोडबाट भएको क्षतिको विवरण संकलन गर्दै पीडितसँग प्रत्यक्ष छलफल गरिएको थियो।
दोस्रो र तेस्रो दिन हरिनगर नगरपालिकाको घुस्की र गौतमपुर क्षेत्रमा रहेका धार्मिक संस्था तथा अन्य सार्वजनिक–निजी सम्पत्तिमा भएको क्षतिको पनि अनुगमन गरिएको छ। मन्त्री मेहताले पीडितका समस्या सम्बन्धित निकायमा उठाउने र आवश्यक सहयोग सुनिश्चित गर्ने बताएकी छन्।
यसैबीच, देवानगञ्ज गोलीकाण्डपछि लागू गरिएको कर्फ्यू हटाउँदै प्रशासनले निषेधाज्ञा केही क्षेत्रमा सीमित गरेको छ। सुनसरीका प्रमुख जिल्ला अधिकारी ईश्वरीप्रसाद अर्यालका अनुसार पूर्व–पश्चिम राजमार्ग क्षेत्रमा पाँच दिन लगाइएको कर्फ्यू हटाइएको छ भने देवानगञ्ज र हरिनगर नगरपालिकामा मात्रै साँझ ५ बजेसम्म निषेधाज्ञा कायम राखिएको छ।
यसअघि इटहरी पाक्लीदेखि कोशी ब्यारेजसम्मको क्षेत्रमा आवतजावत, भेला, जुलुस, प्रदर्शन तथा अन्य गतिविधिमा रोक लगाउँदै कर्फ्यू जारी गरिएको थियो। हाल अधिकांश क्षेत्रबाट प्रतिबन्ध हटाइएको प्रशासनले जनाएको छ।