झापा, सुनसरी र कपिलवस्तुमा १५ संक्रमित थप

जेठ ६, काठमाण्डौ । मंगलबार बिहान झापा, सुनसरी र कपिलवस्तुमा गरी १५ जना कोरोना संक्रमित थपिएका छन् । 

प्रदेश १ मा पर्ने झापामा मात्रै ९ संक्रमित थपिएका छन् । यस्तै सुनसरीमा पनि २ संक्रमित थपिएका छन् । 

झापाको केचनाबाट ल्याइएको स्वाब नमुना परीक्षणका क्रममा संक्रमण पुष्टि भएको प्रदेश १ को सामाजिक विकास मन्त्रालयले जनाएको छ । योसँगै झापामा कोरोना संक्रमितको संख्या १२ पुगेको छ । सोमबार केचनामा एकजनामा संक्रमण पुष्टि भएपछि उनको सम्पर्कमा रहेका स्थानीयको नमूना संकलन गरी ल्याइएको थियो, सोही क्रममा नयाँ संक्रमित थपिएका हुन् ।

हिजोसम्म कोरोना संक्रमित फेला नपरेको सुनसरीमा समेत २ जना संक्रमित थपिएका छन् । योसँगै सुनसरीमा फेला परेका संक्रमितको संख्या ३ पुगेको छ । 

धरानस्थित वीपी कोइराला स्वास्थ्य विज्ञान प्रतिष्ठानको प्रयोगशालामा गरिएको परीक्षणका क्रममा इटहरी उपमहानगरपालिका वडा २ का १८ वर्षीय युवक र अर्का एकजना सुरक्षाकर्मीमा संक्रमण पुष्टि भएको हो । 

यसअघि सोमबार सुनसरीको गढी गाउँपालिकाका एक युवकमा संक्रमण पुष्टि भएको थियो । उनी केही दिनअघि भारतको नयाँ दिल्लीबाट आएका थिए ।

यसैबीच, कपिलवस्तुमा पनि मंगलबार थप ४ जनामा कोरोना संक्रमण पुष्टि भएको छ । मायादेवी गाउँपालिका– ४ का ३ जना र वडा नं ३ का एक जना पुरुषमा कोरोना संक्रमण पुष्टि भएको हो ।

मायादेवी गाउँपालिका ४ का ४०, ४२ र ४५ वर्षका पुरुष र वडा नं ३ का २० वर्षका पुरुषमा कोरोना संक्रमण पुष्टि भएको स्थानीय प्रशासनले जनाएको छ ।