छोरी बचाउ राष्ट्रिय जागरण अभियान सुरु गर्न सरकारसँग नेकपाको माग

भदौ ८ , काठमाडौं । प्रतिपक्षी दल नेकपाले बालिका बलात्कार तथा हत्याका घटना न्यूनीकरण गर्न ‘छोरी बचाउ राष्ट्रिय जागरण अभियान’ सुरु गर्न सरकारसँग आग्रह गरेको छ।
सोमबार प्रतिनिधिसभाको बैठकमा बोल्दै नेकपाका प्रमुख सचेतक युवराज दुलालले बाराकी तीन वर्षीया गरिमा चौधरीको बलात्कारपछि हत्या भएको घटनालाई स्मरण गर्दै देशभर बालिका सुरक्षासम्बन्धी राष्ट्रिय अभियान आवश्यक रहेको बताए।
उनले बालिका तथा छोरीमाथि हुने यस्ता हृदयविदारक घटनाप्रति दुःख व्यक्त गर्दै सरकारलाई तत्काल अभियान सञ्चालन गर्न आह्वान गरे।
बैठकमा दुलालले प्रधानमन्त्री बालेन शाहले सार्वजनिक भ्रमणका क्रममा भीआईपी प्रोटोकल पालना गर्नुपर्ने विषयमा पनि सरकारको ध्यानाकर्षण गराए। प्रधानमन्त्री सार्वजनिक पदमा रहेकाले भ्रमण तथा सार्वजनिक गतिविधिमा आवश्यक प्रोटोकलको पालना गर्नुपर्ने उनको भनाइ थियो।
त्यस्तै, उनले बढ्दो महँगी नियन्त्रणका लागि अर्थमन्त्री स्वर्णिम वाग्लेको ध्यानाकर्षण गराए। नेपालबाट पानी निर्यात गर्न अनुमति मागिरहेका विभिन्न कम्पनीको प्रक्रिया पूरा गरी आवश्यक अनुमति दिन पनि उनले सरकारसँग आग्रह गरे।