गुवाहाटीमा २५ वर्षीया महिलाको हत्या, फ्रिजमा भेटियो टाउको

भदौ २२, काठमाडौं । भारतको असमस्थित गुवाहाटीमा २५ वर्षीया महिलाको निर्मम हत्या भएको छ। गुवाहाटीको बशिष्ठापुरस्थित फ्ल्याटमा मृत अवस्थामा भेटिएकी रिया तालुकदार गोस्वामीको काटिएको टाउको फ्रिजभित्र प्लास्टिकको झोलामा राखिएको अवस्थामा फेला परेको प्रहरीले जनाएको छ।

छिमेकीहरूले फ्ल्याटबाट दुर्गन्ध आउन थालेपछि प्रहरीलाई खबर गरेका थिए। त्यसपछि प्रहरीले फ्ल्याटमा प्रवेश गरी रियाको शव फेला पारेको थियो। प्रारम्भिक अनुसन्धानअनुसार उनको हत्या शव भेटिनुभन्दा करिब ४८ घण्टा अघि भएको हुनसक्ने प्रहरीको अनुमान छ।

प्रहरीका अनुसार घटनास्थलबाट एउटा हतियारसमेत बरामद भएको छ। रियाका औँलाहरू पनि काटिएको अवस्थामा भेटिएको बताइएको छ।

घटनामा रियाका श्रीमान् रामानुजन गोस्वामीलाई प्रहरीले मुख्य आरोपीका रूपमा पहिचान गरेको छ। अनुसन्धान अघि बढिरहेका बेला उनले प्रहरीसमक्ष आत्मसमर्पण गरेको र अपराध स्वीकार गरेको एक वरिष्ठ प्रहरी अधिकारीले बताएका छन्।

रियाको विवाह रामानुजनसँग करिब छ महिनाअघि भएको थियो। दुवै जना गुवाहाटीस्थित सोही फ्ल्याटमा बस्दै आएका थिए। घटनापछि रियाको शव पोस्टमार्टमका लागि गुवाहाटी मेडिकल कलेज तथा अस्पताल पठाइएको छ।