गाडीभित्र मृत भेटिएकी कर्मचारी, घटना रहस्यमय

साउन १२ ,काठमाडौं । काठमाडौँको तारकेश्वर नगरपालिका–१ स्थित बालेबासे क्षेत्रमा गाडीभित्रै एक महिलाको शव फेला परेको घटनाले रहस्य थपेको छ। सानीमा क्यापिटल्समा कार्यरत ४५ वर्षीया रश्मि रिजाल शनिबार आफ्नै विद्युतीय गाडीको पछाडिको सिटमा मृत अवस्थामा फेला परेकी हुन्।
बीएई ०४१० नम्बरको गाडी बाहिरबाट सामान्य अवस्थामा देखिए पनि भित्र रश्मि जलेको अवस्थामा भेटिएकी थिइन्। तर गाडीको सिटमा खासै क्षति नभएको र शरीर पनि पूर्ण रूपमा नजलेको अवस्थाले घटनालाई थप शंकास्पद बनाएको परिवारको दाबी छ।
रिजाल शुक्रबार बिहानदेखि हराएकी थिइन्। सम्पर्कमा नआएपछि परिवारले प्रहरीमा निवेदन दिएको थियो। त्यसपछि खोजीका क्रममा प्रहरीलाई तारकेश्वरस्थित बालुवा प्रशोधन केन्द्र नजिक शंकास्पद रूपमा रोकिएको गाडीबारे सूचना प्राप्त भयो। सोही गाडी रिजालको भएको पुष्टि भएपछि प्रहरीले जाँच गर्दा उनी मृत अवस्थामा भेटिएकी थिइन्।
प्रहरीले घटनास्थल वरपरका सीसीटीभी फुटेज संकलन गरी अनुसन्धान अघि बढाएको छ। प्रहरीका अनुसार फुटेजमा रिजाल आफैँ गाडी चलाएर घटनास्थलमा पुगेको, त्यसपछि पछाडिको सिटमा सरेर गाडीका सिसा बन्द गरेको र आफैँलाई ज्वलनशील पदार्थ छर्किएर आगो लगाएको देखिएको दाबी गरिएको छ।
प्रहरीका अनुसार गाडीका सबै सिसा बन्द भएकाले आगो फैलिन नसकेको र अक्सिजन अभावका कारण उनको मृत्यु भएको हुनसक्ने प्रारम्भिक अनुमान गरिएको छ।
शव पोस्टमार्टमका लागि त्रिवि शिक्षण अस्पताल पठाइएकोमा आइतबार आफन्तले बुझेर दाहसंस्कार गरेका छन्। परिवारले भने घटनाको निष्पक्ष अनुसन्धान गरी सत्यतथ्य बाहिर ल्याउन माग गरेको छ।
जिल्ला प्रहरी परिसर काठमाडौंका प्रवक्ता एसपी पवनकुमार भट्टराईका अनुसार घटनाबारे ज्यान सम्बन्धी कसुरमा जाहेरी परेको छ र थप अनुसन्धान जारी रहेको छ।