कोरोनाबाट नेपालमा आठौँ मृत्यु, आज निधन भएकी बाजुराकी २ वर्षे बालिकामा कोरोना पुष्टि

जेठ १८, काठमाण्डौ । बाजुरा सदरमुकाम मार्तडीस्थित जिल्ला अस्पतालको आइसोलेसनमा आइतबार बिहान ज्यान गुमाएकी २ वर्षीया बालिकामा कोरोना संक्रमण पुष्टि भएको छ । योसँगै नेपालमा कोरोनाबाट ज्यान गुमाउनेको संख्या ८ पुगेको छ।

उपचारकै क्रममा बिहान करिब २ बजे ती बालिकाको मृत्यु भएको थियो। धनगढीस्थित सेती प्रादेशिक अस्पतालको प्रयोगशालामा गरिएको स्वाब परीक्षणका क्रममा ती बालिकामा कोरोना पुष्टि भएको हो। बालिकासँगै उनकी आमा पनि कोरोना संक्रमण पुष्टि भएको छ। 

कैलालीका गौरिफन्टा नाकाहुँदै ती बालिका र उनका परिवारजन ८ दिनअघि बाजुरा आएका थिए। बूढीगंगा वडा नं। धुरालचैन घर भएकी ती बालिकासहित परिवारका सदस्य गाउँकै क्वारेन्टाइनमा बसेका थिए। क्वारेन्टाइनमा बसेको ४ दिनमा समस्या आएपछि ती बालिकालाई परिवारजनले जिल्ला गत जेठ १५ गते अस्पताल ल्याएका थिए। 

भारतमा आउँदादेखि नै बालिकालाई ज्वारो आउने, बान्ता हुने समस्या देखिएको परिवारजनले बताएका छन्। 

अस्पताल पुराउँदा बालिकामा कडा निमोनिया देखिएको अस्पतालका चिकित्सकहरुले बताएका छन्। उनमा श्वास फेर्न कठिन र मुटुको चालसमेत बढेको थियो। 

शनिबार बिहान बालिकासँगै उनका बुवा र आमाको पनि पीसीआर परीक्षणका लागि स्वाव संकलन गरिएको चिकित्सकहरुले बताएका थिए।