कोरोनाबाट गम्भीर शिक्षकको मृत्यु

जेठ ७, काठमाण्डौ । कोरोना भाइरसबाट संक्रमित भई गम्भीर अवस्थामा उपचार भइरहेका एक शिक्षकको निधन भएको छ । 

कोरोना भाइरसबाट संक्रमित गुल्मीको एक शिक्षकको बुधबार बिहान ज्यान गएको हो । 

योसहित नेपालमा कोरोना संक्रमणबाट मर्नेको संख्या ३ पुगेको छ । 

प्रदेश ५ का सामाजिक विकासमन्त्री सुदर्शन बरालले बिजशालासँग टेलिफोनमा कुरा गर्दै गम्भीर अवस्थामा उपचाररत कोरोना संक्रमित ती पुरुषको बुधबार निधन भएको जानकारी दिएका हुन् । 

गुल्मीका ती शिक्षकमा कोरोना संक्रमण पुष्टि भएपछि सोमबार रुपन्देहीको तिलोत्तमास्थित क्रिमसन अस्पताल भर्ना गरिएको थियो । त्यहाँ उनको भेन्टिलेटरमा राखेर उपचार जारी राखिएको थियो । सोमबार साँझदेखि नै उनको स्वास्थ्य अवस्था बिग्रिएको थियो । 

गुल्मीको मदाने गाउँपालिका  घर भएका ती शिक्षक दमका रोगी समेत थिए । उनी जेठ १ गते उच्च ज्वरो र रुघाखोकी लागेपछि अस्पताल भर्ना भएका थिए । कोरोनासँग लक्षण मिलेपछि स्वाब परीक्षण गर्दा संक्रमण पुष्टि भएको थियो । 

ती शिक्षकले अध्यापन गराउने विद्यालयलाई स्थानीय निकायले क्वारेन्टिन बनाएको छ । त्यहाँ विदेशबाट आएकाहरुलाई राखिएको र कुनै संक्रमित त्यहाँ आएर बसेका कारण त्यहीबाट उनलाई संक्रमण भएको हुनसक्ने प्रारम्भिक अनुमान गरिएको छ । 

शिक्षकको अवस्था गम्भीर भएदेखि नै क्रिमसन अस्पताल, उनको स्थायी बसोबास भएको क्षेत्र लगायत शिल गरी उनको सम्पर्कमा गएकाहरुको परीक्षण भइरहेको छ ।