कैलालीमा पुनः एक वृद्धा महिलामा कोरोना भाइरस संक्रमण भएको पुष्टि, नेपालमा संक्रमितको संख्या १४ पुग्यो

वैशाख १, काठमाडौं । कैलालीमा पुनः एक वृद्धा महिलामा कोरोना भाइरस संक्रमण भएको छ ।  स्वास्थ्य तथा जनसङ्ख्या मन्त्रालयका प्रवक्ता डा विकास देवकोटाले कैलालीको लम्की र रौतहटमा एकएक जनामा कोरोना भाइरसको सङ्क्रमण देखिएको आज मन्त्रालयमा आयोजित पत्रकार सम्मेलनमा जानकारी गराउनुभयो । 
 

यससँगै नेपालमा १४ जना कोरोना सङ्क्रमित  भएको पाइएको छ  । उनीहरु दुवै  भारतबाट आएको जनाइएको छ । उहाँले केन्द्रीय जनस्वास्थ्य प्रयोगशालामा परीक्षणका क्रममा उनीहरुलाई सङ्क्रमण देखिएको जानकारी दिनुभयो । 
 

सङ्क्रमितमध्ये रौतहटका १९ वर्षीय पुरुष तथा लम्कीकी ६५ वर्षीया महिला हु्न । ती महिला भने लम्की बहुमुखी क्याम्पसको क्वारेन्टाइनमा बसेकी छन् । अहिलेसम्म कैलालीमा छ, बागलुङ र  काठमाडौँमा दुईदुई तथा  रौतहटमा एक र पर्सामा तीन कोरोना सङ्क्रमित फेला परेका छन् ।

६५ वर्षीया वृद्धा १८ गते अन्य ३५ जनासँगै बसको यात्रा गरी कैलाली पुगेकी थिइन् । उनको स्थायी घर कैलालीको लम्कीचुहा नगरपालिकामा पर्छ । ती महिलासहितलाई १८ गतेबाट २९ गतेसम्म क्वारेन्टाइनमा राखिएको थियो । 

लकडाउनका कारण अलपत्र परेपछि स्थानीय प्रशासनले उनीसहित ३५ जनालाई बस बुकिङ गरेर कैलाली पुर्याएको समेत अनुसन्धानको क्रममा खुलेको प्रहरीले जनाएको छ । 

प्रहीका अनुसार ती महिलासहित कैलाली पुगेका ३५ जनाकै समूहलाई विभिन्न स्थानमा रहेको क्वारेन्टाइनमा राखिएको थियो । जसमध्ये कोरोना पोजेटिभ देखिएकी महिलासहित १७ जनालाई लम्कीचुहा बहुमुखी क्याम्पसको क्वारेन्टाइनमा राखिएको थियो । 

क्याम्पसमा रहेका सबैको केही दिनअघि द्रूत गतिको परीक्षण गरिएकोमा सुरुमा नेगेटिभ रिपोर्ट आएको थियो । तर, पीसीआरबाट परीक्षण गर्दा भने ती महिलाको रिपोर्ट पोजेटिभ आएको हो ।  ती महिलाको दोश्रो चरण निकालिएको स्वाबको परीक्षण भने राष्ट्रिय जनस्वास्थ्य प्रयोगशाला काठमाडौँमा गरिएको थियो । 

महिलामा कोरोना पोजेटिभ देखिएपछि उनीसँगै क्याम्पसको क्वारेन्टाइनमा बसेका सबैलाई फिर्ता बोलाइएको छ । बसमा ती महिलासँगै यात्रा गर्ने अरुको पनि खोजी गर्ने काम भइरहेको स्वास्थ्य मन्त्रालयस्थित स्रोतले जानकारी दिएको छ । 

कोरोना संक्रमित महिलालाई भने धनगढीस्थित सेती प्रादेशिक अस्पतालको आइसोलेसनमा राखिएको छ ।