कांग्रेसले ‘महिला उद्यमशीलता सम्मेलन’ आयोजना गर्दै

भदौ ८, काठमाडौं । नेपाली कांग्रेसले महिला उद्यमशीलताको प्रवर्द्धन र आर्थिक सशक्तीकरणलाई केन्द्रमा राख्दै ‘महिला उद्यमशीलता सम्मेलन’ आयोजना गर्ने भएको छ।
कांग्रेस केन्द्रीय कार्यालय सानेपामा भदौ ११ गते हुने एकदिने सम्मेलनको उद्देश्य महिला उद्यमीको आर्थिक भूमिकालाई थप प्रभावकारी बनाउँदै नेपालको आर्थिक रूपान्तरणमा योगदान पुर्‍याउनु रहेको पार्टीले जनाएको छ।
सम्मेलनमा महिला उद्यमीका लगानी तथा वित्तीय पहुँच, बजार विस्तार, प्रविधिको प्रयोग, डिजिटल बजार र व्यवसाय विस्तारका चुनौती तथा अवसरबारे छलफल हुनेछ। यसका लागि व्यवसाय, वित्तीय क्षेत्र, प्रविधि, पर्यटन, सूचना प्रविधि तथा निजी क्षेत्रका विज्ञ सहभागी हुने गरी तीनवटा विषयगत प्यानल सञ्चालन गरिनेछ।
कार्यक्रमसँगै ८० भन्दा बढी महिला उद्यमीका उत्पादन तथा सेवाको प्रदर्शनीसमेत आयोजना गरिनेछ। प्रदर्शनीमा उद्यमीले आफ्ना उत्पादन तथा सेवा उपभोक्ता, व्यवसायी, लगानीकर्ता र सम्भावित साझेदारसमक्ष प्रस्तुत गर्ने अवसर पाउनेछन्।
सम्मेलनको अर्को आकर्षण ‘मेरो उद्यमशील यात्रा’ रहनेछ। यसमा सफल महिला उद्यमीले आफ्नो संघर्ष, चुनौती, सफलता र अनुभव सुनाउँदै नयाँ पुस्तालाई उद्यमशीलतामा अघि बढ्न प्रेरित गर्नेछन्।
त्यस्तै, कार्यक्रममा लगानी, वित्तीय पहुँच, व्यवसाय दर्ता तथा सरकारी सेवासम्बन्धी जानकारी केन्द्रसमेत सञ्चालन गरिने कांग्रेसले जनाएको छ।
सम्मेलन भदौ ११ गते बिहान ८ बजे सुरु हुनेछ। कांग्रेसले कार्यक्रममा १० हजारभन्दा बढी सहभागीले अवलोकन गर्ने अपेक्षा गरेको छ।